‘सेक्रेड गेम्स’का निर्माता तिहाड जेलमाथि वेब सिरिज बनाउँदैः चार्ल्स शोभराजदेखि अफजल गुरुसम्मका कथा
<p>नयाँदिल्ली। भारतको चर्चित तिहाड जेलका कथा छिट्टै टेलिभिजनमार्फत हेर्न पाइने भएको छ। त्यसका लागि तिहाड जेलका अनुभवहरूको समेटिएको पुस्तक ‘ब्ल्याक वारेन्ट’को अधिकार फिल्म निर्माता बिक्रमादित्य मोटवानीको कम्पनी ‘आन्दोलन फिल्म्स’ तथा लेखक-पत्रकार जोसी जोसेफको कम्पनी ‘कन्फ्लुएन्स मिडिया’ले खरिद गरेका छन्।</p>
<p>पुस्तकको प्रकाशक रोली बुक्सले ट्विटरमार्फत त्यसबारे जानकारी दिएको हो। “पुस्तकको सम्पूर्ण अधिकार आन्दोलन फिल्म्सले अधिग्रहण गरेको छ,” रोली बुक्सको ट्विटमा भनिएको छ, “पुस्तकलाई हामी एक नयाँ प्लेटफर्ममार्फत लाखौं मानिससम्म पुर्‍याउँदै छौं।”</p>
<p>मोटवानीको ‘आन्दोलन फिल्म्स’ त्यही कम्पनी हो, जो भारतको पहिलो नेटफ्लिक्स ओरिजिनल ‘सिरिज सेक्रेड गेम्स’को निर्माता हो।</p>
<p>‘ब्ल्याक वारेन्ट’ तिहाड जेलमा सबैभन्दा लामो समय सुपरिटेन्डेन्ट रहेका सुनिल गुप्ता र पत्रकार सुनेत्रा चौधरीले लेखेका हुन्। गुप्ताले आफ्नो सेवा कालमा धेरै कैदीबन्दीको जेल यात्रा देखेका थिए। तिनै अनुभव पुस्तकमा समेटेका छन्। </p>
<p>अनलाइन न्युज पोर्टल 'द प्रिन्ट'का अनुसार पुस्तकमा रंग बिल्ला, चार्ल्स शोभराज, अफजल गुरु तथा दिल्लीमा भएको सामूहिक बलात्कार काण्डका अभियुक्तहरूको कथा पनि समावेश छ। नोभेम्बर २०१९ मा यो पुस्तक बजारमा आएको हो।</p>
<p>मोटवानीले ‘उडान’ र ‘लुटेरा’जस्ता फिल्म निर्माण गरेका छन्। “ब्ल्याक वारेन्ट सनसनीखेज, नाटकीय र शानदार छ। र, भारतको सबैभन्दा ठूलो जेलको परिदृश्य यस पुस्तकले समेटेको छ,” मोटवानीले भनेका छन्।</p>
<p>उक्त नयाँ सिरिज कुन स्ट्रिमिङ प्लेटफर्ममा देखाइनेछ भन्‍ने मोटवानीले घोषणा गरेका छैनन्।</p>
प्रतिक्रिया दिनुहोस्
.jpg)
