चलचित्र विकास बोर्डको अध्यक्षमा दयाराम दाहाल नियुक्त
<p>काठमाडौं। नेपाल चलचित्र विकास बोर्डको अध्यक्ष दयाराम दाहाल नियुक्त भएका छन्। चलचित्र निर्देशक, गीतकार तथा निर्माता दाहाललाई २२ जेठमा बसेको मन्त्रिपरिषद् बैठकले दुई वर्षका लागि अध्यक्षमा नियुक्त गरेको हो। </p>
<p>तत्कालीन अध्यक्ष केशव भट्टराईको निधनपछि विगत ६ महीनादेखि बोर्डको अध्यक्ष पद रिक्त थियो। दाहाल हाल बोर्डको सदस्य थिए ।</p>
<p>सञ्‍चार तथा सूचना प्रविधि मन्त्रालयले बोर्ड अध्यक्षका लागि आवेदन मागेको थियो। जसमा १० जनाले आवेदन दिएका थिए। तीमध्ये अभिनेता भुवन केसी, सांस्कृतिक संस्थानका पूर्वमहाप्रबन्धक राजेश थापा र दाहालको नाम मन्त्रिपरिषदमा सिफारिस भएको थियो।</p>
<p>नवनियुक्त अध्यक्ष दाहालले चलचित्र क्षेत्रका समस्याको दीर्घकालीन समाधान गर्ने उद्देश्यले अगाडि बढ्ने बताए। लामो समयदेखि चलचित्र क्षेत्रका समस्याबारे आफू जानकार रहेको बताउँदै त्यसको समाधानका लागि काम गर्ने उनले देखापढीसँग बताए। </p>
<p>"चलचित्र उद्योगलाई कसरी राम्रोसँग अगाडि बढाउने भनेर सबै सरोकारवाला निकायसँग छलफल गरेर अगाडि बढ्छौं," दाहालले भने। </p>
<p>२०४५ सालमा निर्मित फिल्म ‘लाहुरे’को पोस्ट प्रोडक्सनमार्फत् चलचित्र क्षेत्रमा भित्रिएका दाहाल ‘दाइजो’मार्फत चलचित्र निर्देशक बनेका थिए। हालसम्म ४० भन्दा बढी फिल्मको निर्देशन गरिसकेका छन्।<br />
<br />
उनको पछिल्लो चलचित्र ‘रानी’ हो भने प्रदर्शनको पखाईमा ‘लैबरी लै’ छ। उनले ‘दौँतरी’, ‘ठूल्दाइ’, ‘तँ त साह्रै बिग्रिस नि बद्री’, ‘म तिमीविना मरिहाल्छु’, ‘दैव’लगायत चलचित्र निर्माण गरेका छन्।</p>
प्रतिक्रिया दिनुहोस्
.jpg)
