संक्रमितलाई परिवारसँगै राखिँदा जोखिम बढ्यो
<p>कैलाली। धनगढी उपमहानगरपालिका १४ का दुई जना कोरोना भाइरस संक्रमितलाई अरूसँगै क्‍वारेन्टाइनमै राखिँदा जोखिम बढेको छ।</p>
<p>हिजो २२ वर्षीया युवती र २६ वर्षीय युवकलाई कोरोना संक्रमण पुष्टि भएको थियो। तर, १५ घण्टादेखि उनीहरूलाई अस्पताल नलगी अझै क्‍वारेन्टाइनमै राखिएको छ।</p>
<p>दुवै संक्रमित १४ दिनअघि भारतको दिल्लीबाट एउटै गाडीमा त्रिनगर नाका हुँदै स्वदेश भित्रिएका थिए।</p>
<p>संक्रमित युवतीका श्रीमान् र छोरा तथा संक्रमित पुरुषकी श्रीमती र २७ दिने छोरी एउटै कोठामा १४ दिनदेखि बस्दै आएका छन्। </p>
<p>संक्रमित युवतीका तीन वर्षीय छोरालाई भने घर पठाइएको छ। कोरोना पुष्टि भएको १५ घण्टा पुगे पनि संक्रमित महिलाका श्रीमान्, संक्रमित पुरुषकी श्रीमती र २७ दिनकी छोरी एउटै कोठामा बसिरहेका छन्।</p>
<p>धनगढी-१४ का वडाध्यक्ष रामबजारी चौधरीले संक्रमित दुवै जना परिवारका सदस्यसँगै रहेको स्वीकार गर्दै अस्पताल लैजान एम्बुलेन्स नआएकाले एउटै कोठामा राख्नु परेको बताए। विद्यालय भरिभराउ रहेकाले फरक-फरक कोठामा राख्‍न नसकिएको उनले बताए।</p>
प्रतिक्रिया दिनुहोस्
.jpg)
