सुर्खेतमा मृत्यु भएका युवकमा कोरोना संक्रमण पुष्टि
<p>काठमाडौं। क्‍वारेन्टाइनमा १४ दिन बसेर घर फर्किएलगत्तै हिजो बिहान मृत्यु भएका सुर्खेतको पन्चपुरी नगरपालिका १ का २० वर्षीय युवकमा कोरोना संक्रमण पुष्टि भएको छ।</p>
<p>सुर्खेत प्रादेशिक अस्पतालमा मृत्युपछि गरिएको थ्रोट स्वाब परीक्षणमा ती युवकमा कोरोना संक्रमण पुष्टि भएको अस्पतालका मेडिकल सुपरिटेन्डेन्ट डाक्टर डम्बरबहादुर खड्काले जानकारी दिए।</p>
<p>मृत्युलगत्तै प्रादेशिक अस्पतालबाट स्वास्थ्यकर्मीहरूको टोली नमूना संकलन गर्न पन्चपुरी पुगेका थिए। त्यहाँबाट अपराह्न नमुना सुर्खेत ल्याएर मध्यरातमा परीक्षण गरिएको थियो।</p>
<p>क्‍वारेन्टाइनमा १४ दिन बसेर दुईपटक आरडीटी किट परीक्षण रिपोर्ट नेगेटिभ देखिएपछि ती युवकलाई २१ जेठमा घर पठाइएको थियो।</p>
<p>उनको हिजो बिहान मृत्यु भएको हो। पन्चपुरी नगरपालिका १ का अध्यक्ष धनबहादुर थापाले राति एक्कासी स्वास्थ्यमा समस्या आएको र लगत्तै युवकको मृत्यु भएको जानकारी दिए।</p>
<p>“भारतको मुम्बईबाट आएपछि १४ दिन क्‍वारेन्टाइनमा बसेका थिए,” उनले भने, “कुनै लक्षण थिएन। आरडीटी परीक्षण गरेर रिपोर्ट नेगेटिभ आएपछि घर पठाइएको थियो।”</p>
<p>युवकसहित जनता मावि विद्यापुर क्‍वारेन्टाइनमा रहेका वडा नम्बर १ का ६ जनालाई २१ जेठ दिउँसो घर पठाइएको थियो। </p>
<p>७ जेठमा भारतको मुम्बईबाट आएका उनीहरूलाई १४ दिन क्‍वारेन्टाइनमा राखेर स्वास्थ्य परीक्षणपछि घर पठाइएको थियो।</p>
<p>क्‍वारेन्टाइनमा बस्दासम्म त्यहाँ रहेका कुनै पनि व्यक्तिमा कोभिड-१९ को लक्षण नदेखिएको वडाध्यक्ष थापाले जानकारी दिए।</p>
प्रतिक्रिया दिनुहोस्
.jpg)
