अमेरिकामा भइरहेको प्रदर्शनमा किन सहभागी छन् दक्षिण एशियाली ?
<p>वासिङ्टन। प्रहरीको अत्यधिक बल प्रयोगबाट अमेरिकी अश्‍वेत युवक जर्ज फ्लोयडको मृत्यु भएपछि अमेरिकाभर हिंसा भड्किएको छ। र, राष्‍ट्रपति डोनाल्ड ट्रम्प प्रशासनविरुद्ध व्यापक प्रदर्शन भइरहेको छ। तिनै प्रदर्शनमा सामेल छन्, दक्षिण एशियाली मुलका अमेरिकी पनि।</p>
<p>उनीहरूको भनाइ छ, “कुनै न कुनै दिन हामीले पनि प्रहरीको बर्बरता भोगेकै छौं।”</p>
<p>हेल्थ केयर इन्‍नोभेसनको क्षेत्रमा काम गर्ने राहुल दुबेले ७० भन्दा बढी प्रदर्शनकारीलाई आफ्नो अपार्टमेन्टमा बस्‍न दिए। राति सवा नौ बजे प्रहरीले प्रदर्शनकारीमाथि आक्रमण गर्‍यो। निर्घात कुटपिट थाल्यो। दुबेले कराउँदै आफ्नो अपार्टमेन्टमा आउन प्रदर्शनकारीहरूलाई आग्रह गरे। र, ७० जनाभन्दा प्रदर्शनकारी उनको घरमा गएर बसे।</p>
<p>इथाका कलेजको सेन्टर फर इन्डिपेन्डेन्ट मिडियाका निर्देशक रजा रुमी अहिलेको प्रदर्शनलाई आगामी राष्‍ट्रपति चुनावको मुद्दा मान्छन्। ९/११ को आतंककारी आक्रमणपछि अमेरिकामा रहेका मुसलमान समुदायले बढी नै प्रहरीको बर्बरता र निगरानी झेल्नु परिरहेको छ। अहिलेको प्रदर्शनमा उनीहरूको सहभागिता पनि त्यसैको उपज भएको रुमी बताउँछन्।</p>
<p>“अब सधैं त्यस्तो चल्दैन,” उनी भन्छन्, “मेरो पनि रंग उनीहरूको भन्दा फरक छ, अर्थात कालो छु। र, म पाकिस्तानबाट आएको एक मुसलमान हुँ। जुनसुकै बेला मैले पनि त्यही अवस्था बेहोर्नुपर्नेछ।”</p>
<p>प्रदर्शनमा सहभागी छात्रा मिनाहिल मेहदी हार्वर्ड विश्‍वविद्यालयमा स्‍नातक अध्ययनरत छिन्। उनी पाकिस्तानमा जन्मे–हुर्केकी हुन्। “यहाँ काला जातिमाथि वर्षौंदेखि शोषण भइरहेको छ र उनीहरूलाई साथ दिनु हाम्रो कर्तव्य हो,” उनी भन्छिन्।</p>
<p>टिन्यान्ट्स युनियनसँग काम गरिरहेकी शान्ति सिंह पनि प्रदर्शनहरूमा सहभागी छिन्। “किनकि, अमेरिकामा दक्षिण एशियालीहरूलाई आदर्श अल्पसंख्यकका रूपमा लिइन्छ,” उनी भन्छ्नि, “र, उनीहरूलाई काला जाति, मुख्य आदिवासी र ल्याटिन अमेरिका मुलका मानिसविरुद्ध प्रयोग गर्न खोजिन्छ।”</p>
<p>प्रदर्शनमा सहभागी भइरहेका छात्र अली इलाही अफ्रिकी मुलका अमेरिकीसँग एकजुटता देखाउन चाहन्छन्। त्यसैले प्रदर्शनमा सहभागी छन्। “यदि पाकिस्तानमा यो स्तरको बर्बरता हुन्थ्यो भने अहिलेसम्ममा त्यसमा संलग्नहरूमाथि कारवाही भइसकेको हुने थियो,” उनी भन्छन्, “यति गम्भीर अपराध प्रधानमन्त्रीको तहमा पुगेर अपराधीमाथि सख्त कारवाही हुने थियो।”</p>
<p>भारत, पाकिस्तान, बंगलादेश, श्रीलंका दक्षिण एशियाका जुनसुकै देशबाट अमेरिका आएर बसेका भए पनि काला जातिको यस प्रदर्शनमा साथ दिनुपर्ने उनी बताउँछन्।</p>
प्रतिक्रिया दिनुहोस्
.jpg)
