कोरोना भाइरस परिवर्तनशील छैन तर खतरनाक छः डब्लूएचओ
<p>वासिङ्टन । विश्‍व स्वास्थ्य संगठन (डब्लूएचओ)ले कोरोना भाइरस परिवर्तनशील नरहेको बताएको छ । संसारभरका धेरै वैज्ञानिक कोरोनाको जिनोमको अध्ययनमा जुटेको र ती कुनैबाट पनि भाइरस परिवर्तनशील रहेको नदेखिएको डब्लूएचओको भनाइ छ ।</p>
<p>“तर, त्यसको अर्थ कोरोना भाइरस खतरनाक छैन भन्‍ने होइन,” डब्लूएचओकी इन्फेक्सस डिजिज इपिडिमियोलोजिस्ट डा. मारिया भान केर्खोभले भनिन्, “४० हजारभन्दा बढी जिनोमका दृश्य संकलन गरिएको छ । के भाइरस परिवर्तन भइरहेको छ भनेर वैज्ञानिहरूले अध्ययन गरिरहेका छन् ।”</p>
<p>उनका अनुसार इन्फ्लुएन्जा र कोरोनाजस्ता आरएनए भाइरसहरू अस्थिर हुन्छन् । भाइरस आफैं परिवर्तन भएको भने अहिलेसम्म नदेखिएको उनको भनाइ छ । “अझ बढी बिमारी फैलाउने गरी भाइस परिवर्तन भएको देखिएको छैन,” डा. मारियाले भनिन् ।</p>
<p>भाइरस आफैंसँग झन् बढी झन् खतरनाक बन्‍ने क्षमता नरहेको उनले बताइन् । मानिसले भौतिक दूरीलगायत भाइरसबाट बच्न अपनाउनुपर्ने सावधानी अवलम्बन नगर्दा नै कोरोना भाइरसको प्रसार तीव्र बनेको उनले बताइन् ।</p>
<p>“अझै पनि लकडाउन, भौतिक दूरीजस्ता नियमलाई कडाइका साथ पालना गराउनुपर्छ,” उनले भनिन्, “मानिस जति जटिल बन्दै जान्छन्, त्यति नै भाइरस खतरनाक बन्‍ने हो । त्यसैले सबैले संयम अपनाउनु जरुरी छ ।”</p>
<p>डब्लूएचओको हेल्थ इमर्जेन्सी कार्यक्रमका कार्यकारी निर्देशक डा. माइक र्‍यानले कोरोना भाइरस शुरुदेखि नै खतरनाक रहेको औंल्याए । “यसलाई हामीले निरन्तर निगरानी गरिरहेका छौं । र, यो स्थिर नै देखिँदै आएको छ,” उनले भने ।</p>
प्रतिक्रिया दिनुहोस्
.jpg)
