आरडीटी नेगेटिभ आएपछि क्वारेन्टाइनबाट घर पठाइएका युवकको मृत्यु
<p>काठमाडौं। क्‍वारेन्टाइनमा १४ दिन बसेपछि आरडीटी किट परीक्षणमा नेगेटिभ रिपोर्ट आएर घर पठाइएका सुर्खेतका एक युवकको मृत्यु भएको छ।</p>
<p>सुर्खेतको पन्चपुरी नगरपालिका १ का २० वर्षीय युवकको हिजोराति मृत्यु भएको हो। वडा नम्बर १ का अध्यक्ष धनबहादुर थापाले राति एक्कासी स्वास्थ्यमा समस्या आएको र लगत्तै युवकको मृत्यु भएको जानकारी दिए।</p>
<p>“भारतको मुम्बईबाट आएपछि १४ दिन क्‍वारेन्टाइनमा बसेका थिए,” उनले भने, “कुनै लक्षण थिएन। हिजै आरडीटी परीक्षण गरेर रिपोर्ट नेगेटिभ आएपछि घर पठाइएको थियो।”</p>
<p>युवकसहित जनता मावि विद्यापुर क्‍वारेन्टाइनमा रहेका वडा नम्बर १ का ६ जनालाई दिउँसो घर पठाइएको वडाध्यक्ष थापाले जानकारी दिए। “क्‍वारेन्टाइनबाट फर्किएपछि एकजना घरमै होम क्‍वारेन्टाइनमा अलग्गै बसे। ५ जना घरमा छुट्टै बस्‍ने व्यवस्था नभएपछि नजिकैको सामुदायिक भवनमा बस्ने व्यवस्था मिलाइएको थियो,” उनले भने, “साँझपख घरमै खाना खाएर सुत्‍न त्यहाँ आएका थिए। राति एक्कासी श्‍वासप्रश्‍वासमा समस्या आएछ। मलाई खबर भएर त्यहाँ पुग्दासम्म मृत्यु भइसकेको थियो।”</p>
<p>७ जेठमा भारतको मुम्बईबाट आएका उनीहरूलाई १४ दिन क्‍वारेन्टाइनमा राखेर स्वास्थ्य परीक्षणपछि घर पठाइएको थियो। क्‍वारेन्टाइनमा बस्दासम्म त्यहाँ रहेका कुनै पनि व्यक्तिमा कोभिड-१९ को कुनै लक्षण नदेखिएको वडाध्यक्ष थापाले जानकारी दिए।</p>
<p>उनका अनुसार मृतक युवकको थ्रोट स्वाबको नमूना संकलन गरेर सदरमुकामस्थित सुर्खेत प्रादेशिक अस्पताल पठाउने तयारी भइरहेको छ। सदरमुकामबाट स्वाब संकलन गर्न स्वास्थ्यकर्मीहरूको टोली आइरहेको उनले जानकारी दिए।</p>
प्रतिक्रिया दिनुहोस्
.jpg)
