ह्युमानिटी फाउन्डेसनद्वारा एक व्यक्ति दुई किट अभियान सञ्चालन
<p>धनगढी। सुदूरपश्‍चिम प्रदेशका कोरोना भाइरस परीक्षणको दर बढाउन ह्युमानिटी फाउन्डेसनले एक व्यक्ति दुई किट अभियान सञ्‍चालन गरेको छ।</p>
<p>किट अभावमा भारतबाट भित्रिएका अढाइ लाखभन्दा बढीको परीक्षण हुन नसकेकाले अभियान शुरु गरिएको फाउन्डेसनका अध्यक्ष श्याम तायलले बताए।</p>
<p>अभियानअन्तर्गत आरडीटी र पीसीआर गरी ४० हजार किट प्रदेश सरकारलाई उपलब्ध गराउने लक्ष्‍य रहेको उनले जानकारी दिए।</p>
<p>सुदूरपश्‍चिममा दैनिक पाँच हजारदेखि सात हजारजना भारतबाट भित्रिइरहेका छन्। अझै डेढ लाखभन्दा बढी भित्रिने अनुमान छ।</p>
<p>त्यसरी भारतबाट भित्रिएकाहरूको आरडीटी र पीसीआर परीक्षण हुन सकेको छैन। दैनिक करिब दुई सय ५० जनाको मात्र परीक्षण भइरहेको छ।</p>
<p>सुदूरपश्‍चिमका नौवटै जिल्लाका क्‍वारेन्टाइनमा ५० हजार जनाभन्दा बढी बसिरहेका छन्। उनीहरूको परीक्षण हुन सकेको छैन।</p>
<p>४० हजार किट उपलब्ध गराउँदा भारतबाट भित्रिएका १० प्रतिशतको कोरोना परीक्षण गर्न सकिने तायल बताउँछन्। “त्यसबाट सुदूरपश्‍चिममा कोरोनाको जोखिम पत्ता लगाउन तथा रोकथाम र नियन्त्रणमा ठूलो मद्दत पुग्‍ने विश्‍वास छ,” उनले भने।</p>
<p>उनका अनुसार संघीय सरकारका उद्योग, वाणिज्य तथा आपूर्ति मन्त्री लेखराज भट्टलाई एक सय थान र्‍यापिड किट हस्तान्तरण गरेर एक व्यक्ति दुई किट अभियान शुरु गरिएको हो।</p>
<p>अभियानका लागि विभिन्‍न देशबाट सहयोगको प्रतिबद्धता आएको तायलले जानकारी दिए।</p>
<p>अभियानका सदस्य दीर्घराज उपाध्यायका अनुसार विभिन्‍न देशमा रहेका सुदूरपश्‍चिमेली तथा प्रवासमा रहेका सुदूरपश्‍चिमेली समाज, गैरआवासीय नेपाली संघसँगको समन्वय र सहकार्यमा अभियान सञ्‍चालन गरिएको हो।</p>
<p>प्रवासबाट यो अभियानमा गैरआवासीय नेपाली संघ अन्तर्राष्‍ट्रिय समितिका पूर्व कोषाध्यक्ष हिक्मत थापा, नेपाली कांग्रेस जनसम्पर्क समिति अमेरिकाका सभापति आनन्द बिष्‍टलगायत सुदूरपश्‍चिमेलीहरूले साथ र सहयोग छ।</p>
प्रतिक्रिया दिनुहोस्
.jpg)
