इरानमा कोभिड-१९ को दोस्रो तरंग
<p>तेहरान। इरानमा हिजो कोभिड-१९ का तीन हजार एक सय ३४ नयाँ बिरामी फेला परेका छन्।</p>
<p>एक सातायता कोरोना भाइरसका संक्रमित संख्या ५० प्रतिशतको दरले वृद्धि भएको छ। हालसम्म एक लाख ६० हजार ६ सय ९६ संक्रमित पुगेका छन्। तीमध्ये आठ हजारभन्दा बढीको मृत्यु भएको छ।</p>
<p>पछिल्लो दैनिक आँकडा दुई महीनायताकै सर्वाधिक हो, जसले इरानमा कोभिड-१९ को दोस्रो तरंगको संकेत गर्छ।</p>
<p>स्वास्थ्य मन्त्रालयले भौतिक दूरी र मास्क लगाउनेलगायत भाइरसको प्रसारबाट जोगिने उपाय कडाइका साथ पालना गर्नु आवश्यक रहेको बताएको छ।</p>
<p>राजधानी तेहरानमै अस्पताल भर्ना हुने संक्रमित बढिरहँदा स्वास्थ्य मन्त्रालयका प्रवक्ताले सजग हुन आग्रह गरेका छन्। इरानले अप्रिलदेखि लकडाउन खुकुलो बनाउँदै लगेको थियो।</p>
<p>अमेरिकाको ब्लुमबर्ग अनलाइनका अनुसार त्यतिबेला इरानमा संक्रमित संख्या ७० हजार २९ मात्र थियो।</p>
<p>अहिले संक्रमितको संख्यामा वृद्धि हुनुलाई एक ठूला उद्योगपतिले सरकार दोषी बताए। उनको भनाइमा सरकारले चेतनामुलक गतिविधिमा ध्यान नदिँदाको परिणाम हो यो। उनका अनुसार इरानका नागरिकले कोभिड-१९ को महामारीलाई गम्भीरतापूर्वक लिएकै छैनन्।</p>
प्रतिक्रिया दिनुहोस्
.jpg)
