कोभिड-१९ को संकटमा रोहिंग्या शरणार्थी
<p>ढाका। डुंगा शरणार्थीका रूपमा परिचित रोहिंग्या मुसलमान समुदाय कोरोना भाइरस संक्रमणको ठूलो जोखिममा देखिएका छन्।</p>
<p>म्यानमारबाट सरकारी निकाय र अन्य समुदायको अत्याचारबाट ज्यान जोगाउन भागेका उनीहरू बंगलादेशका शरणार्थी शिविरमा बसोबास गर्छन्। रोहिंग्याले आश्रय लिएका शिविरहरू संसारकै ठूला शरणार्थी शिविर मानिन्छ।</p>
<p>कोभिड-१९ का कारण एक ७१ वर्षीय शरणार्थी वृद्धको मृत्यु भएपछि ती शरणार्थी शिविरमा त्रास फैलियो। लगत्तै शिविरमा बसिरहेका २९ जनामा कोरोना भाइरसको संक्रमण पुष्‍टि भयो।</p>
<p>सरकारले शिविर क्षेत्रलाई लकडाउनमा राखेको छ। आपतकालीन अवस्थाका मानिसलाई मात्र शिविरबाट बाहिर जान अनुमति छ।</p>
<p>बीबीसीका अनुसार करिब १० लाखको बसोबास रहेको शरणार्थी शिविरमा भौतिक दूरी कायम गर्नु चुनौतीपूर्ण छ।</p>
<p>रोहिंग्या शरणार्थी शिविरमा बंगलादेश सरकारले इन्टरनेट चलाउन प्रतिबन्ध लगाएको छ। विश्‍व स्वास्थ्य संगठनको अपिलका बावजुन प्रतिबन्ध खुलाइएको छैन।</p>
<p>कोरोना भाइरसको महामारीका विषयमा सर्वसाधारणसम्म सूचना पुर्‍याउन इन्टरनेट प्रभावकारी माध्यम बन्‍ने विश्‍व स्वास्थ्य संगठनले बताउँदै आएको छ। शिविरमा साबुन, पानीलगायत आधारभूत सुविधा पनि पुग्‍न सकेको छैन।</p>
<p>महामारीबाट बचाउन सरकारले सयौं आइसोलेसन बेड शिविरभित्र तयार पारेको छ। तर, स्वास्थ्य सेवाको स्तर सामान्य अवस्थाको मात्र छ।</p>
<p>गम्भीर बिरामीका लागि भेन्टिलेटरको सुविधा उपलब्ध छैन। स्वास्थ्य अवस्था जटिल बनेपछि नजिकैको कक्स बजारस्थित अस्पतालमा लगिने गरेको छ। तर, त्यहाँ पनि प्रशस्त सुविधा उपलब्ध छैन।</p>
प्रतिक्रिया दिनुहोस्
.jpg)
