भर्चुअल प्रतिस्पर्धामा नेपाललाई चार स्वर्ण
<p>काठमाडौं। इन्टरनेशनल पेन्डामिक भर्चुअल गेम्समा नेपाली उमा कुङ्फु खेलाडीले चार स्वर्ण पदक जितेका छन्।</p>
<p>वर्ल्ड मार्सल आर्ट्स कमिटीले अनलाइनमार्फत् गराएको प्रतिस्पर्धामा नेपालले चार स्वर्णसँगै दुई रजत र एक कांस्य पदक पनि जितेको नेपाल उमा कुङ्फु संघका अध्यक्ष सिद्धार्थ लामा तामाङले बताए।</p>
<p>अष्ट्रियाको ब्रिगेन्जमा २८ देखि ३० मेसम्म भएको प्रतियोगितामा कमल मगर, मुन्नी सुवेदी लामा तामाङ, जमुना गुरूङ र सुदीप श्रेष्ठले स्वर्ण पदक जिते।</p>
<p>कमलले पुरुष ताइचीको सफ्ट स्टाइलमा स्वर्ण पदक जिते भने नन ट्रेडिसनल वेपन विधानमा कांस्य हात पारे।</p>
<p>सुदीपले पुरुष फम्स विथ म्युजिकमा स्वर्ण पदक जिते। मुन्नीले महिलातर्फ ताइची सफ्ट स्टायलमा स्वर्ण पदक जितेकी थिइन्।</p>
<p>जमुनाले महिला ताइचीमा स्वर्ण पदक जितिन्। सञ्जयराज पुटुवारले सफ्ट स्टायल तथा ट्रेडिसनल वेपन दुवै विधामा रजत पदक प्राप्त गरे।</p>
<p>प्रतियोगितामा विभिन्न चार महादेशबाट १४ राष्ट्रका २३३ खेलाडीले प्रतिस्पर्धा गरेको अध्यक्ष लामाले जानकारी थिए। नेपालबाट पाँच खेलाडीले प्रतिस्पर्धा गरेकोमा सबैले पदक जित्न सफल भएका हुन्।</p>
<p>सहभागी खेलाडीले आफ्नो स्पर्धाको १ देखि ३ मिनेटसम्मको भिडिओ क्लिप्स पठाउनु पर्ने थियो। एक स्पर्धाका लागि खेलाडीले १५ युरो दर्ता शुल्क तोकिएको थियो। एक भन्दाबढी स्पर्धामा भाग लिने खेलाडीले अतिरिक्त ५ युरो दर्ता शुल्क तिरेको अध्यक्ष लामाले बताए।</p>
<p>कोभिड-१९ का कारण आफ्नो सम्पूर्ण वार्षिक प्रतियोगिता स्थगित गर्नु परेपछि वर्ल्ड मार्सल आर्ट्स कमिटीले यस्तो भर्चुअल प्रतियोगिता आयोजना गरेको थियो।</p>
प्रतिक्रिया दिनुहोस्
.jpg)
