गण्डकी प्रदेशले सागका पदक विजेता खेलाडीलाई नगदसहित पुरस्कृत गर्ने
<p>पाेखरा। गण्डकी प्रदेश सरकारले १३औँ दक्षिण एशियाली खेलकुद (साग)मा गण्डकी प्रदेशबाट सहभागी भई पदक विजेता खेलाडीलाई नगदसहित पुरस्कृत गर्ने भएको छ।</p>
<p>प्रदेश सरकारको हिजाेको मन्त्रिपरिषद् बैठकले पदक विजेता खेलाडीलाई पुरस्कृत गर्ने निर्णय गरेको सरकारका प्रवक्ता एवं भौतिक पूर्वाधार विकासमन्त्री रामशरण बस्नेतले जानकारी दिए।</p>
<p>सरकारले व्यक्तिगततर्फ स्वर्ण विजेतालाई एक लाख, रजत पदकलाई ७५ हजार तथा कांस्य पदकलाई जनही ५० हजार रूपैयाँका दरले पुरस्कृत गर्ने निर्णय गरेको छ।</p>
<p>समूहतर्फ स्वर्ण विजेतालाई ७५ हजार, रजतलाई ५० तथा कांस्य पदकलाई ३० हजार रूपैयाँ पुरस्कार प्रदान गर्ने भएको छ।</p>
<p>त्यसैगरी प्रशिक्षकलाई समेतलाई जनही ३० हजार, १५ हजार र १० हजार रूपैयाँका दरले सरकारले पुरस्कार दिने भएको छ।</p>
<p>मन्त्री बस्नेतले कोभिड–१९ को अहिलेको विषम अवस्थाका कारणले तत्कालै पुरस्कार प्रदान गर्न नसकिएकाले उपयुक्त समयमा खेलाडीहरूलाई घोषित नगद पुरस्कार प्रदान गरिने बताए।</p>
<p>सागमा व्यक्तिगत र टिम इभेन्टमा गरी गण्डकीका कूल ३७ जना खेलाडीले चार स्वर्ण, २३ रजत र १६ कांस्य गरी ४३ पदक जितेको पश्चिमाञ्चल क्षेत्रीय खेलकुद विकास समितिका कार्यालय प्रमुख लक्ष्मणनाथ योगीले जानकारी दिए। <em>रासस</em></p>
प्रतिक्रिया दिनुहोस्
.jpg)
