संविधान दोस्रो संशोधन विधेयक राजपत्रमा प्रकाशित
<p>काठमाडौं। सरकारले 'नेपालको संविधान (दोस्रो संशोधन) विधेयक २०७७' नेपाल राजपत्रमा प्रकाशित गरेको छ।</p>
<p>सर्वसाधारणको जानकारीका लागि उक्त विधेयक हिजो, १८ जेठको राजपत्रमा प्रकाशित गरिएको हो।</p>
<p>नेपालको पूर्ण नक्शासहितको निशान छाप अद्यावधिक गर्न संविधान संशोधन गर्न लागिएको छ।</p>
<p>सरकारले संसदमा ९ जेठमा संविधान संशोधन गर्न विधेयक दर्ता गरेकामा कानून, न्याय तथा संसदीय मामिलामन्त्री डा. शिवमाया तुम्बाहाङफेले हिजो प्रतिनिधि सभा समक्ष उक्त विधेयक प्रस्तुत गरेकी थिइन्।<br />
<br />
संविधान संशोधन विधेयक सदनमा प्रस्तुत भएपछि सर्वसाधारणको जानकारीका लागि नेपालपत्रमा प्रकाशित गर्नु पर्ने संवैधानिक व्यवस्था छ।</p>
<p>संघीय संसद् सचिवालयले पनि उक्त संशोधन विधेयक सर्वसाधारणको जानकारीका लागि गोरखापत्र दैनिक, रेडियो नेपाल र नेपाल टेलिभिजनमासमेत सूचना प्रकाशन र प्रसारण गरेको छ।</p>
<p>सूचनामा नेपालको संविधानको अनुसूची ३ मा रहेको नेपालको निशान छापभित्र अंकित नेपालको नक्सालाई नेपालको वास्तविक सीमाअनुरुप मिलाउन आवश्यक भएकाले संविधान संशोधन गर्न लागिएको उल्लेख छ।<br />
<br />
सर्वसाधारणसँग प्रतिक्रिया लिने उद्देश्यले नभई संविधानअनुरुप जानकारीका लागि सूचना प्रकाशित गरिएको सङ्घीय संसद् सचिवालयका प्रवक्ता डा. रोजनाथ पाण्डेले बताए।</p>
<p>यद्यपी, विधेयकका सम्बन्धमा कुनै जिज्ञासा रहेछ भने आफ्ना जनप्रतिनिधि (सांसद) मार्फत आफ्नो भावना सर्वसाधारणले व्यक्त गर्न भने सक्नेछन्। सात दिनपछि उक्त विधेयकलाई प्रतिनिधिसभामा विभिन्न चरण र प्रक्रिया पूरा गरी निर्णयार्थ प्रस्तुत गरिनेछ।</p>
<p>प्रतिनिधिसभाबाट दुई तिहाइका आधारमा पारित भएपछि उक्त विधेयक राष्ट्रियसभामा प्रवेश पाउनेछ। त्यहाँ पनि प्रतिनिधिसभा जस्तै विभिन्न चरण गरेपछि निर्णयार्थ सदनसमक्ष पेश हुने विधेयकलाई दुई तिहाइका आधारमा अनुमोदन गर्नुपर्नेछ।</p>
<p>दुवै सदनबाट पारित विधेयकलाई सभामुखले प्रमाणित गरी प्रमाणीकरणका लागि राष्ट्रपतिसमक्ष पठाउनुपर्नेछ। राष्ट्रिपतिबाट प्राप्त विधेयक १५ दिनभित्र प्रमाणीकरण हुनेछ। राष्ट्रपतिबाट प्रमाणीकरण भएकै मितिदेखि संविधान सशोधन हुनेछ। <em>रासस</em></p>
प्रतिक्रिया दिनुहोस्
.jpg)
