आरडीटी पोजिटिभ आएपछि क्वारेन्टाइनमा बसेकालाई गोठमा सारियो
<p style="text-align: justify;">दुल्लु। दैलेखको भैरवी गाउँपालिकामा भारतबाट आएर क्वारेन्टाइनमा बसेका चारजनालाई आरडीटी पोजिटिभ देखिएपछि गोठमा सारिएको छ।</p>
<p style="text-align: justify;">गाउँपालिकाको यो कार्य अमानवीय र गैरजिम्मेवार भएको भन्दै टिप्पणी बढ्न थालेको छ।</p>
<p style="text-align: justify;">भैरवी गाउँपालिका-३ स्थित देउती आधारभूत विद्यालयको क्वारेन्टाइनमा राखिएका चारजना आरडिटी परीक्षण रिपोर्ट पोजिटिभ आएपछि उनीहरूलाई गोठमा सारिएको छ।</p>
<p style="text-align: justify;">आरडिटी रिपोर्ट पोजिटिभ आएपछि क्वारेन्टाइनबाट अलग गरेर सावधानी अपनाउन र अन्यलाई नसरोस् भनेर तत्कालका लागि नजिकैको गोठमा सारिएको गाउँपालिकाले जनाएको छ।</p>
<p style="text-align: justify;">तत्काल कुनै वैकल्पिक व्यवस्था नभएकाले सावधानीका लागि गोठ सुरक्षित हुँदा त्यहाँ राखिएको गाउँपालिकाका अध्यक्ष प्रेमबहादुर बुढाले बताए।</p>
<p style="text-align: justify;">उनीहरूलाई गाउँपालिकाको कार्यालय नजिकैको घर भाडामा लिएर व्यवस्थापन गर्न लागिएको बुढाले जानकारी दिए।</p>
<p style="text-align: justify;">“भारतबाट आएका सयौँ दाजुभाइलाई क्वारेन्टाइनमा राख्दा हाम्रा सबै सामुदायिक भवन भरिभराउ भइसके”, उनले भने।</p>
<p style="text-align: justify;">गोठमा राखिएको तस्वीरलाई सामाजिक सञ्जालमा राखेर थप पीडा थप्ने काम भइरहेको उनले दावी गरे।</p>
<p style="text-align: justify;">“हामीले सक्दो प्रयास गरेकै छौँ । बाहिरबाट आउनेलाई व्यवस्थापनमा हामी लागिरहेकै छौँ”, अध्यक्ष बुढाले भने ।</p>
<p style="text-align: justify;">ती चारजनालाई स्वास्थ्यकर्मीको निगरानीमा राखिएको भन्दै पीसीआर परीक्षणको तयारी भइरहेको उनले जानकारी दिए। <em>रासस</em></p>
.jpg)
