बाँके दुर्घटनामा मृत्यु हुनेको संख्या १२ पुग्यो, घाइते २१ जनाको उपचार हुँदै
<p>काठमाडौं। बाँकेको राप्ती सेनारी गाउँपालिका-२ स्थित ठुरिया जंगलमा भएको सवारी दुर्घटनामा परी मृत्यु हुनेको संख्या १२ पुगेको छ।</p>
<p>थप एकजना गम्भीर घाइतेको भेरी अस्पताल नेपालगञ्‍जमा उपचारका क्रममा मृत्यु भएको जिल्ला प्रहरी कार्यालय बाँकेले जनाएको छ।</p>
<p>दुर्घटनामा ११ जनाको घटनास्थलमा नै मृत्यु भएको थियो। घाईते भएका २२ जनालाई त्यहाँबाट उद्दार गरेर राति नै अस्पताल पुर्‍याइएको थियो।</p>
<p>नेपालगञ्‍जबाट सल्यानतर्फ जाँदै गरेको ना. ५ ख ५९९५ नम्बरको माइक्रो बस रोकिराखेको बा. ४ ख ९०६४ नम्बरको ट्रकमा गएराति करिब १ बजेको समयमा ठोक्किएर दुर्घटना भएको हो। मृतकको सनाखत भइरहेको प्रहरीले जनाएको छ।</p>
<p>घटनास्थलमा रहेका इलाका प्रहरी कार्यालय कोहलपुरका प्रमुख डीएसपी कुलदिप चन्दले तीव्र गतिमा रहेको बस रोकि राखेको ट्रकमा ठोकिएको जानकारी दिए।</p>
<p>“चामल लोड गरेको ट्रक बिग्रेपछि सडकमा रोकिएको रहेछ”, उनले भने, “बसको गति तीव्र रहेछ लोड गरिएको ट्रक ३० मिटर भन्दा अगाडी सरेको अवस्था छ।”</p>
<p>बसले पछाडिबाट ठक्कर दिँदा ट्रक कुच्चिएको अवस्था रहेको उनले जानकारी दिए। चन्दका अनुसार राति नै घटनास्थलमा मृत्यु भएका र घाईतेहरुलाई एम्बुलेन्समा राखेर नेपालगञ्ज पठाइएको हो।</p>
<p>गाडीमा ३३ जना सवार थिए। उनीहरु सबै भारतबाट घर फर्किएका सल्यानका मानिसहरु हुन्। जमुनाहा नाकाबाट उनीहरूलाई बसमा राखेर घरतर्फ पठाइएको थियो।</p>
प्रतिक्रिया दिनुहोस्
.jpg)
