१८ कात्तिकदेखि डा. केसीको १७औं अनशन
<p>काठमाडौं। चिकित्सा शिक्षा सुधारको मागसहित प्राध्यापक डा. गोविन्द केसीले १८ कात्तिकबाट १७औंअनशन बस्ने घोषणा गरेका छन्।</p>
<p>आजसम्म माग पूरा नगरे १३ कात्तिकबाट अनशन बस्ने अल्टिमेटम दिएका डा. केसीले तिहार र छठ पर्वका कारण ५ दिनपछि सत्याग्रहसहित आन्दोलन शुरू गर्ने विज्ञप्तिमार्फत जानकारी गराएका छन्।</p>
<p>डा‍. केसी २७ असोजमा त्रिभुवन विश्वविद्यालय शिक्षण अस्पतालबाट सेवा निवृत्त भएका थिए। अवकाश भएलगत्तै उनले पत्रकार सम्मेलन गरेर चिकित्सा शिक्षा ऐनमा संशोधन नगरिए आन्दोलन शुरू गर्ने घोषणा गरेका थिए।</p>
<p>सरकारले केसीसँग १० साउन २०७५ मा सम्झौता गरेको थियो। तर, उक्त सम्झौता अहिलेसम्म पनि कार्यान्वयन नभएको भन्दै केसीले आन्दोलनको चेतावनी दिएका छन्।</p>
<p>डा. केसीले आफूसँग भएको सम्झौताअनुसार चिकित्सा शिक्षा ऐनमा संशोधन गर्नुपर्ने, विश्वविद्यालयहरूमा पदाधिकारी नियुक्तिको हालको प्रक्रिया रोकी पराशर कोइराला नेतृत्वको मापदण्ड निर्धारण समितिले दिएको सुझावअनुरूप निष्पक्ष र पारदर्शी ढंगले पदाधिकारी नियुक्त गर्ने कानूनी व्यवस्था गर्नुपर्नेलगायतका ६ बुँदे माग अघि सारेका छन्।</p>
<p>डा. केसी यसअघि १६ पटक अनशन बसिसकेका छन्। <br />
</p>
प्रतिक्रिया दिनुहोस्
.jpg)
