कालीमाटी वृत्तका थप १०६ प्रहरीको रिपोर्ट पनि नेगेटिभ
<p>काठमाडौ। महानगरीय प्रहरी वृत्त कालीमाटीमा कार्यरत थप १०६ जना प्रहरीको पनि कोभिड-१९ परीक्षण रिपोर्ट नेगेटिभ आएको छ।</p>
<p>राष्ट्रिय जनस्वास्थ्य प्रयोगशाला टेकुमा गरिएको नमूना परीक्षण रिपोर्ट नेगेटिभ आएको महानगरीय प्रहरी परिसर काठमाडौंका प्रमुख एसएसपी श्याम ज्ञवालीले जानकारी दिए।</p>
<p>यसअघि एक सय १६ जना प्रहरीको परीक्षण रिपोर्ट नेगेटिभ आएको थियोे। अब ९ जनाको रिपोर्ट आउन बाकि रहेको एसएसपी ज्ञवालीले जानकारी दिए।</p>
<p>वृत्तमा कार्यरत प्रहरी नायब निरीक्षक र एक प्रहरी जवानमा कोरोना संक्रमण पुष्टि भएपछि वृत्त र प्रभागसहित त्यहाँ रहेका ट्राफिक प्रहरीसमेत दुई सय ३१ जनाको थ्रोट स्वाबको नमूना संकलन गरिएको थियो।</p>
<p>नमूना संकलन गरिएका सबै प्रहरी अहिले क्‍वारेन्टाइनमा छन्। उनीहरू सबै ब्यारेकभित्रै बसिरहेका छन्। दुईजनामा संक्रमण पुष्टि भएपछि वृत्त नै सिल गरिएको छ। रिपोर्ट सबैको नेगेटिभ आएपछि त्यसैअनुसार नियमित काममा फर्किने परिसरले जनाएको छ।</p>
<p>त्यहाँ कार्यरत सबै प्रहरी क्‍वारेन्टाइनमा रहेपछि कालीमाटी क्षेत्रलाई कभर गर्ने गरी कीर्तिपुर वृत्त आसपास क्षेत्र र महानगरीय प्रहरी कार्यालय रानीपोखरी र परिसरको टोलीले सुरक्षा गरिरहेको छ।</p>
प्रतिक्रिया दिनुहोस्
.jpg)
