कोभिड-१९ : अत्यावश्यक सामान पुर्याउन ड्रोन
<p>वासिङ्टन। मुख्य शहरभन्दा बाहिरका अस्पतालहरूमा कोभिड-१९ को रोकथाम र उपचारका लागि अत्यावश्यक सामान पुर्‍याउन अमेरिकाको नर्थ क्यारोलिनामा ड्रोनको प्रयोग थालिएको छ।</p>
<p>ती ड्रोनले व्यक्तिगत सुरक्षा सामग्रीको आपूर्ति गरिरहेका छन्। ११ फिटको पंखा जडित ड्रोनहरू हन्टर्सभिल्ले मेडिकल सेन्टरबाट उडान भर्छन्। ६३ माइल प्रतिघण्टाको गतिमा उडान भर्दै शहरभन्दा टाढाका अस्पतालहरूमा सामान डेलिभरी गर्छन्। </p>
<p>ड्रोनमा राखिने प्याकेटमा प्यारासुट जडान गरिएको छ, जसले सामानलाई सुरक्षित जमिनमा खसाउन मद्दत गर्छ। एउटा ड्रोनले एक दिनमा १० पटक सामान डेलिभरी गर्छ।</p>
<p>हन्टर्सभिल्ले मेडिकल सेन्टरसहित १५ वटा अस्पताल सञ्‍चालन गर्दै आएको नोभान्ट हेल्थले ड्रोन सेवा शुरु गरेको हो। अस्पतालहरूमा अत्यावश्यक सामान अभाव नहोस् भनेर सेवा शुरु गरिएको कम्पनीले जनाएको छ।</p>
<p>भविष्यमा स्वास्थ्य संकटका बेलामा ड्रोनको उपयोग प्रभावकारी हुने देखिएको कम्पनीको भनाइ छ।</p>
<p>प्राकृतिक विपत्ति, भूराजनीतिक तनावलगायत संकटका बेला स्वास्थ्य सामग्रीको आपूर्ति कठिन बन्‍ने र ड्रोन त्यसका लागि उपयोगी हुने नोभान्ट हेल्थकी चिफ डिजिटल एन्ड टेक्नोलोजी अफिसर एन्जेला योचेम बताउँछिन्। </p>
<p>“हामीलाई बिरामीको उपचारमा रहेका अवरोधहरू छिचोल्ने उपायहरू अवलम्बन गर्नुछ,” उनले सीएनएनसँग भनिन्, “मानिसलाई बचाउन त्यस्ता उपाय उपयोगी हुन सक्छन्।”</p>
<p>स्वास्थ्य सामग्रीको आपूर्तिका लागि ड्रोन उडाउन नोभान्ट हेल्थले फेडेरल एभिएसन एडमिनिस्ट्रेसन (एफएए)बाट अनुमति पाएको छ। ‘जिपलाइन’ नामक स्टार्टअप कम्पनीले नोभान्ट हेल्थलाई ड्रोन उपलब्ध गराएको छ। </p>
<p>हालसम्म एक लाख १० हजार थान स्वास्थ्य सामग्री ढुवानी गरिसकिएको जिपलाइनले जनाएको छ। उक्त कम्पनीले सन् २०१६ देखि रुवान्डा र गत वर्षदेखि घानामा पनि ड्रोन सेवा सञ्‍चालनमा ल्याएको छ।</p>
प्रतिक्रिया दिनुहोस्
.jpg)
