पूर्वउपरथी श्रेष्ठबाट ५८ लाख असुल गर्ने सैनिक अदालतको फैसला
<p>काठमाडौं। समरी जनरल सैनिक अदालतले सैनिक हवाई महानिर्देशनालय, गौचरमा कार्यरत रहँदा सम्पत्ति र अनुशासन तथा आचरण सम्बन्धी कसूर गरेको अभियोगमा अवकाशप्राप्त पाइलट उपरथी सुधीर श्रेष्ठलाई कारबाही गर्ने फैसला गरेको छ। पूर्वउपरथी श्रेष्ठले सैनिक सेवाबाट अवकाश पाइसकेका छन्।</p>
<p>हवाई महानिर्देशनालयमा भएका अनियमितता छानबिन गर्न रथीको अध्यक्षतामा गठित कोर्ट अफ इन्क्वायरी बोर्डको मिति ४ चैत २०७६ को रायसहितको प्रतिवेदनको आधारमा जनरल सैनिक अदालत गठन गरिएको थियो।</p>
<p>महानिर्देशनालयका तत्कालीन महानिर्देशक पाइलट उपरथी श्रेष्ठसहित १९ जना प्रतिवादीहरू उपर सम्पत्ति र अनुशासन तथा आचरण सम्बन्धी कसूर गरेको मुद्दा पुर्पक्ष गरिएकोमा अदालतले १२ जेठमा गरेको फैसला आज उनीहरूलाई सुनाइएको जंगीअड्डाले जनाएको छ।</p>
<p>अदालतले पूर्वउपरथी श्रेष्ठलाई नसिहत तथा रकम असुल गर्ने फैसला गरेको छ भने आठजना सैनिक अधिकृतलाई सचेत गराउने र एकजना अधिकृत तथा ९ जना अन्य दर्जाका सैनिकलाई सफाइ दिने फैसला गरेको छ।</p>
<p>श्रेष्ठ तत्कालीन सैनिक हवाई महानिर्देशक रहँँदा ५८ लाख ९५ हजार ५९० रूपैयाँ अनियमितता गरेको पाइएको भन्दै सैनिक अदालतले उक्त रकम असूल उपर गर्ने फैसला गरेको हो।</p>
<p>नेपाली सेनाले पद्दति र प्रणालीमा आधारित संगठन सञ्चालनमा जोड दिँदै पारदर्शिता र जवाफदेहिता कायम गर्ने तथा दण्डहिनताको अन्त्य गर्ने लक्ष्यअनुसार अनुशासन र आचरणविपरीत कार्य गर्नेहरूलाई कारबाही गरिएको जनाएको छ।</p>
प्रतिक्रिया दिनुहोस्
.jpg)
