बेटिस र सेभियाबीचकाे डर्बी खेलबाट ला लिगा ११ जुनबाट शुरू हुने
<p>काठमाडौं। स्पेनिस ला लिगा ११ जुनबाट पुनः शुरू हुने र अर्को सिजन १२ सेप्टेम्बरबाट शुरू हुने लिगका अध्यक्ष जाभियर टेबासले बताएका छन्।</p>
<p>अध्यक्ष टेबासले लिग खाली रंगशालामा हुने र पुनः शुरू हुँदाको पहिलो खेल रियाल बेटिस र सेभियाबीच डर्बी खेल हुने बताएका छन्।</p>
<p>‘‘हामी पुनः शुरू गर्न तयार छौं। र, लिग सकिएको दिन हाम्रो लागि महत्त्वपूर्ण हुनेछ’’, स्पेनिस पत्रिका मार्कासँग टेबासले भनेका छन्।</p>
<p>गत शनिबार स्पेनका प्रधानमन्त्री पेड्रो सान्चेजले स्पेनको शीर्ष श्रेणीका दुई लिग ८ जुनबाट सञ्चालन गर्ने सक्ने भनेर अनुमति दिएका थिए। ला लिगाका क्लबहरूले गत साताबाट १० भन्दा धेरै खेलाडीको समूहमा प्रशिक्षण गर्न शुरू गरेका थिए।</p>
<p>कोरोना भाइरसका कारण स्पेनमा १२ मार्चबाट फुटबल स्थगित भएको थियो। टेबासले अब छिट्टै क्लबहरूले पूर्णरूपमा प्रशिक्षण शुरू गर्ने बताएका छन्।</p>
<p>लिगमा ११ खेल बाँकी रहँदा साविक विजेता बार्सिलोना शीर्ष स्थानमा छ भने दुई अंक कम भएको रियाल मड्रिड दोस्रो स्थानमा छ।</p>
<p>इङ्लिस प्रिमियर लिगले १७ जुनबाट स्थगित सिजन शुरू गर्ने घोषणा गरेको छ। त्यस्तै इटालियन सिरी ‘ए’ पनि २० जुनबाट शुरू गर्ने तयारी भएको छ।</p>
प्रतिक्रिया दिनुहोस्
.jpg)
