कालीमाटी वृत्तका ११६ प्रहरीको रिपोर्ट नेगेटिभ, ११५ जनाको रिपोर्ट आउन बाँकी
<p>काठमाडौं। महानगरीय प्रहरी वृत कालीमाटीमा कार्यरत एक सय १६ जना प्रहरीको कोरोना भाइरस(कोभिड–१९) को परीक्षण रिपोर्ट नेगेटिभ आएको छ।</p>
<p>महानगरीय प्रहरी परिसर काठमाडौंका प्रमुख एसएसपी श्याम ज्ञवालीले अहिलेसम्म एक सय १६ को नमूना परीक्षण भइसकेको र उनीहरू सबैको रिपोर्ट नेगेटिभ आएको जानकारी दिए। वृत्तमा कार्यरत प्रहरी नायब निरीक्षक र एक प्रहरी जवानमा कोरोना संक्रमण पुष्टि भएपछि वृत्त र प्रभागसहित त्यहाँ रहेका ट्राफिक प्रहरीसमेत दुई सय ३१ जनाको थ्रोट स्वाबको नमूना संकलन गरिएको थियो।</p>
<p>अब एक सय १५ जनाको परीक्षण रिपोर्ट आउन बाँकी रहेको प्रहरी परिसर काठमाडौंले जनाएको छ। दुई सय ३१ जनाकै नमूना संकलन गरेर परीक्षणका लागि राष्ट्रिय जनस्वास्थ्य प्रयोगशाला टेकुमा पठाइएको थियो।</p>
<p>नमूना संकलन गरिएका सबै प्रहरी अहिले क्‍वारेन्टाइनमा छन्। उनीहरू सबै ब्यारेकभित्रै बसिरहेका छन्। दुईजनामा संक्रमण पुष्टि भएपछि वृत्त नै सिल गरिएको छ।</p>
<p>“बाँकी एक सय १५ जनाको पनि रिपोर्ट आइसकेपछि त्यसपछि उनीहरूलाई तत्काल ड्युटी खटाउने वा केही दिन क्‍वारेन्टाइनमा राख्‍ने निर्णय गर्छौ,” उनले भने, “सातादिनभन्दा बढी क्‍वारेन्टाइनमै बसिसकेका छन्। रिपोर्ट सबैको नेगेटिभ आएपछि त्यसैअनुसार नियमित काममा फर्किन्छन्।”</p>
<p>त्यहाँ कार्यरत सबै प्रहरी क्‍वारेन्टाइनमा रहेपछि कालीमाटी क्षेत्रलाई कभर गर्ने गरी कीर्तिपुर वृत्त आसपास क्षेत्र र महानगरीय प्रहरी कार्यालय रानीपोखरी र परिसरको टोलीले सुरक्षा गरिरहेको छ।</p>
प्रतिक्रिया दिनुहोस्
.jpg)
