प्रदेश २ मा ४०० पुगे संक्रमित, ९७ जना कोरोनामुक्त
<p>महोत्तरी। प्रदेश २ मा कोरोना संक्रमितको कूल संख्या ४०० पुगेको छ।</p>
<p>आज बिहान ९ बजे थप ७६ जनामा संक्रमण पुष्टि भएपछि यस प्रदेशमा जम्मा संक्रमित ४०० पुगेका हुन्।</p>
<p>पछिल्लोपटक संक्रमण पुष्टि भएकाहरुमा धनुषाका २९, महोत्तरीका १७, सप्तरीका १४, सर्लाहीका सात, सिरहाका छ र रौतहटका तीन रहेको प्रदेश २ स्वास्थ्य निर्देशनालयका वरिष्ठ स्वास्थ्य प्रशासक विजयकुमार झाले बताए।</p>
<p>प्रदेशमा सबैभन्दा बढी रौतहटमा ११२ संक्रमित भेटिएका छन्। त्यसैगरी पर्सामा ९५, बारामा ४६, धनुषामा ४२ र सर्लाहीमा ४० जना छन्। सप्तरीमा २९, महोत्तरीमा २२ र सिरहामा १४ जनामा कोरोना संक्रमण पुष्टि भएको छ।</p>
<p>अहिले प्रदेशका आठवटै जिल्लाका भारतीय सीमावर्ती नाकामा घर फर्कनेहरूको भीड लागेको छ। भारतमा सञ्चालन गरिएको रेल सेवासँगै घर फर्कनेको संख्या ह्वात्तै बढेको हो।</p>
<p>प्रदेशमा संक्रमण पुष्टि भएका धेरैजसो भारतबाट नै फर्केकाहरू रहेको निर्देशनालयका वरिष्ठ स्वास्थ्य प्रशासक विजयकुमार झाले बताए।</p>
<p>प्रदेशभरि अहिलेसम्म १० हजार ५८९ को थ्रोट स्वाब नमूना संकलन गरिएको छ। क्वारेटाइनमा रहेकारूको स्वाब संकलन अहिले पनि जारी छ।</p>
<p>संकलन गरिएकामध्ये दुई हजार २७४ जनाको रिपोर्ट आज साँझसम्म आइपुग्ने झाले जानकारी दिए।</p>
<p>यस प्रदेशमा उपचारपश्‍चात कोरोनामुक्त भएर घर फर्कनेको संख्या ९७ पुगेको छ। <em>रासस</em></p>
प्रतिक्रिया दिनुहोस्
.jpg)
