लाइपजिगले दोस्रो स्थानमा उक्लने मौका गुमायो
<p>काठमाडौं। हेर्था बर्लिनसँग बुधराती सम्पन्‍न खेलमा २-२ को बराबरीमा रोकिएपछि आरबी लाइपजिगले जर्मन बुन्डेसलिगाको दोस्रो स्थानमा मौका गुमाएको छ। </p>
<p>दश खेलाडीमा सीमित हुनुका बाबजुद घरेलु टीम लाइपजिगले २-१ को अग्रता लिएको थियो। तर खेल सकिन आठ मिनट बाँकी रहँदा क्रिष्टोफ पिएटेकले पेनाल्टीमा गोल गरेपछि लाइपजिगले अंक बाँड्नु परेको थियो। यससँगै नयाँ प्रशिक्षक ब्रुनो लब्बडियाको प्रशिक्षणमा हेर्था बर्लिन तीन खेलसम्म अपराजित छ। </p>
<p>बराबरीमा रोकिएपछि तेस्रो स्थानको लाइपजिग दोस्रो स्थानको बोरुसिया डर्टमण्डभन्दा दुई अंकले पछाडि छ। जुन शीर्ष स्थानको बायर्न म्युनिख भन्दा ९ अंकले पछाडि हो। हेर्था बर्लिन भने ३५ अंकका साथ दशौं स्थानमा छ। </p>
<p>हेर्था बर्लिनले मार्को ग्रुजिकको गोलबाट नवौं मिनटमा अग्रता लिएको थियो। ग्रुजिकले मार्विन प्लेटिनहार्डको कर्नरमा भलीमार्फत गोल गरेका थिए। २४औं मिनटमा क्लोसटरमनले बराबरी गोल फर्काए। ६३औं मिनटमा मार्सेल हाल्सटेनबर्गले दोस्रो पहेंलो कार्डको सामना गरेपछि लाइपजिग १० खेलाडीमा सीमित भएको थियो।</p>
<p>उनले हेर्था बर्लिनका म्याथ्युज कुनहलाई फाउल गरेपछि दोस्रो पहेंलो कार्डको सामना गरेका थिए। त्यसअघि उनले पहिलो हाफको इन्जुरी समयमा पहिलो पहेंलो कार्ड पाएका थिए। </p>
<p>दश खेलाडीमा सीमित भए पनि प्याट्रिक शिकको गोलमा लाइपजिगले २-१ को अग्रता बनायो। तर खेल सकिन आठ मिनट बाँकी रहँदा कुनहलाई वैकल्पिक खेलाडी एडेडोला लुकम्यानले फाउल गरेपछि हेर्था बर्लिनले पेनाल्टी अवसर पाएको थियो। उक्त अवसरले पिएटेकले खेर जान दिएनन् र हेर्था बर्लिनलाई एक अंक दिलाए। </p>
<p>बुधबारै सम्पन्‍न खेलमा साल्केमा हारको शृंखला रोक्न सकेन। यसअघि डर्टमण्डसँग ४-० तथा औग्सबर्गसँग ३-० ले पराजित भएको साल्के रेलिगेशनबाट बच्‍न संघर्ष गरिरहेको डसेलडोर्फसँग २-१ ले पारजित भयो। हारसँगै साल्के ३७ अंकका साथ नवौं स्थानमा छ भने डसेलडोर्फ १६औं स्थानमा छ। </p>
<p>अन्य खेलमा होफेनहेइमले कोल्नलाई ३-१ ले पराजित गर्दा युनियन बर्लिन र मेइन्जले १-१ को बराबरी खेले। त्यस्तै औसबर्गले पाडरबोर्नसँग गोलरहित बराबरी खेल्यो।</p>
प्रतिक्रिया दिनुहोस्
.jpg)
