डीएसपीमा बढुवा भएका ६० जनालाई दर्ज्यानी चिन्ह प्रदान
<p>काठमाडौं। प्रहरी नायव उपरीक्षकमा बढुवा भएका ६० जनालाई आज दर्ज्यानी चिन्ह प्रदान गरिएको छ।</p>
<p>प्रहरी प्रधान कार्यालय नक्सालमा आयोजित एक कार्यक्रममा प्रहरी महानिरीक्षक ठाकुरप्रसाद ज्ञवालीसहित अतिरिक्त प्रहरी महानिरीक्षकले ६० जनालाई दर्ज्यानी चिन्ह प्रदान गरेका हुन्।</p>
<p>१३ जेठको गृह मन्त्रालय सचिवस्तरीय निर्णयले ६० जना प्रहरी निरीक्षकलाई प्रहरी नायव उपरीक्षकमा बढुवा सिफारिस गरेको थियो।</p>
<p>प्रहरी महानिरीक्षक ज्ञवालीले सबैलाई बधाई र शुभकामना दिँदै संगठनको उद्देश्य पूरा गर्न आफ्नो ज्ञान, सीप, अनुभव तथा कार्यदक्षता प्रदर्शन गरी उच्च मनोबलका साथ उत्कृष्ट काम गर्न निर्देशन दिए।</p>
<p>व्यक्तिभन्दा संगठनलाई बलियो बनाउनेतर्फ सबै प्रहरी कर्मचारीहरू अग्रसर हुनुपर्ने उल्लेख गर्दै राज्यले सुम्पेको दायित्व र भूमिका तथा नागरिक केन्द्रित सेवा प्रवाह गर्न निष्ठापूर्वक एवं उच्च मनोबलका साथ दायित्व बोध गर्न निर्देशन उनले दिए।</p>
<p>क्षणिक स्वार्थलाई त्याग्दै राष्ट्र र नागरिकको सेवामा समर्पित भएर पूर्ण नैतिकवान भई काम गर्दै संगठनको गरिमा अझै माथि उठाउन एकताबद्ध भई टिमवर्कमा लाग्नुपर्ने उनले जोड दिए।</p>
<p>पदोन्नतिमा मूल्याङ्कनका सूचक र विधिबारे चर्चा गर्दै व्यावसायिक कार्यदक्षता, इमान्दारिता, सेवाभाव तथा कार्यसम्पादनको स्तरलाई आधार मानेर प्रहरी कर्मचारीहरूको मूल्याङ्कन हुने आईजीपी ज्ञवालीले प्रष्ट पारे।</p>
प्रतिक्रिया दिनुहोस्
.jpg)
