चौरजहारी घटनाका दोषीमाथि कारवाही गर्न संवैधानिक कानून व्यवसायी मञ्चको माग
<p>काठमाडौं। अन्तरजातीय प्रेम विवाहको विषयलाई लिएर १० जेठमा रुकुम पश्‍चिम चौरजहारीमा भएको हिंसात्मक घटनामा संलग्नलाई कारवाही गर्न संवैधानिक कानून व्यवसायी मञ्‍चले माग गरेको छ। </p>
<p>उक्त घटनामा परी २१ वर्षीय नवराज विकसहित तीनजनाको मृत्युभएको थियो भने अरू तीन जना भेरी नदीमा बेपत्ता भएका छन्। </p>
<p>मञ्‍चका तर्फबाट अध्यक्ष राजुप्रसाद चापागाईं र महासचिव अनन्तराज लुईंटेलले विज्ञप्ति प्रकाशित गरी उक्त घटनाको निष्पक्ष र शीघ्र अनुसन्धान गरी हत्या, कुटपिट, जातीय भेदभावलगायत कसुरमा संलग्‍नलाई फौजदारी दण्डको भागीदार बनाउन माग गरेका छन्। साथै पीडितलाई पर्याप्त क्षतिपूर्ति दिई जातीयताको कारणबाट हुने कुनै पनि आपराधिक घटनाप्रति राज्यको शून्य सहनशीलतालाई व्यावहारिक रूपमा पुष्टि गर्न पनि मञ्‍चले माग गरेको छ। </p>
<p>‘नेपालको संविधान एवं जातीय विभेदविरुद्धको महासन्धिले छुवाछुत तथा जातीय भेदभावलाई निषेध गरेको एवं जातीय भेदभाव तथा छुवाछूत (कसुर तथा सजाय) ऐन, २०६८ अन्तर्गत यो आपराधिक कार्यको रूपमा रहँदै आएको सर्वविदितै छ,’ विज्ञप्तिमा छ, ‘तथापि २१औं शताब्दिको सभ्य लोकतान्त्रिक समाजमा जातीयताको आधारमा कानूनलाई हातमा लिएर यस खालका क्रुरतापूर्ण घटना समाजमा वारम्वार दोहोरिने स्थिति सृजना हुनुले जातीय भेदभाव तथा छुवाछुत अन्त्य गर्ने राज्यको पटक पटकको प्रतिज्ञा खोक्रो सावित हुँदै गएको छ।’</p>
<p>मञ्‍चले व्यक्तिको ज्यूज्यान र मानवीय मर्यादाको संरक्षण गर्नुपर्ने राज्यको संवैधानिक दायित्वको पूर्ण परिपालना गर्न पनि अपिल गरेको छ। साथै जातीय भेदभाव र छुवाछूतका सन्दर्भमा नेपालमा विद्यमान दण्डहीनताको संस्कृतिलाई अन्त्य गर्न तिनै तहका सरकारले राष्ट्रव्यापी, योजनावद्ध र रणनीतिक कदमहरु चाल्न पनि मञ्‍चले आव्हान गरेको छ।</p>
प्रतिक्रिया दिनुहोस्
.jpg)
