डोटीमा एकै दिन भारतबाट २८७९ जना भित्रिए, किट नहुँदा परीक्षणबिनै क्वारेन्टाइनमा राखियो
<p>डोटी। कैलालीको त्रिनगर भन्सार कार्यालयको बाटो हुँदै हिजो साँझ मात्रै पाँच हजारभन्दा बढी नेपाली भित्रिएका छन्।</p>
<p>जसमा डोटी जिल्लाका मात्रै दुई हजार ८७९ छन्। उनीहरूलाई यहाँका नौ वटै स्थानीय तहले तयार पारेका ६७ क्वारेन्टाइनमा राखिएको जिल्ला प्रशासन कार्यालय डोटीले जनाएको छ।</p>
<p>घर फर्किएकाहरूमा शिखर नगरपालिकाका सबैभन्दा बढी छन्।</p>
<p>एकैपटक धेरैजना आएको र परीक्षणको लागि आरडीटी किट नभएका कारण उनीहरूलाई बिनाजाँच क्वारेन्टाइनमा राख्न थालिएको छ।</p>
<p>भारतबाट फर्किएकामध्ये दिपायल सिलगढी नगरपालिकामा ५६६, शिखर नगरपालिकामा ६३३, सायल गाउँपालिकामा २५९, केआइसिंह गाउँपालिकामा ५१४, जोरायल गाउँपालिकामा ६३, बोगटान फुड्सिल गाउँपालिकामा २१४, बडिकेदार गाउँपालिकामा २४२, आदर्श गाउँपालिकामा २८५ र पूर्वीचौकी गाउँपालिकामा १०३ गरेर कूल दुई हजार ८७९ लाई राखिएको प्रमुख जिल्ला अधिकारी टेकनारायण पौडेलले बताए।</p>
<p>उनीहरू ७९ महिला, पुरुष दुई हजार ७८४ र बालबालिका १६ छन् ।</p>
<p>डोटीमा क्वारेन्टाइन बेड संख्या एक हजार २८३, आइसोलेसन शय्या संख्या ५१ रहेको जिल्ला स्वास्थ्य कार्यालय डोटीका प्रमुख रमेश मलासीले बताए।</p>
<p>मलासीका अनुसार जिल्लाबाट हालसम्म ३६९ जनाको पिसीआर परीक्षणका लागि स्वाब स्कलन गरिएकोमा ३५९ जनाको रिर्पोट नेगेटिभ आएको छ।</p>
<p>१० जनाको रिर्पोट आउन बाँकी छ। <em>रासस</em></p>
प्रतिक्रिया दिनुहोस्
.jpg)
