वृद्ध हत्याको आरोपमा सर्लाहीमा छोरा पक्राउ
<p>सर्लाही। सर्लाहीको बसबरिया गाउँपालिकामा गएराति एक वृद्धको घरेलु धारिलो हतियार प्रहारबाट हत्या भएको छ।</p>
<p>बसबरिया गाउँपालिका-५ धनगढा निवासी ७५ वर्षीय रामअधिन रायको धारिलो हतियार प्रहारबाट मृत्यु भएको सर्लाहीका प्रहरी प्रवक्ता एवं प्रहरी नायब उपरीक्षक मदन कुँवरले बताए।</p>
<p>आफ्नै आँपको बगैँचामा सुतिरहेको अवस्थामा वृद्धको हत्या भएको कुँवरले बताए। घरेलु हतियारले वृद्धको टाउको र हातमा चोट लागेको छ। </p>
<p>वृद्धको हत्या आरोपमा मृतकका कान्छो छोरा ४० वर्षीय विनोद रायलाई प्रहरीले पक्राउ गरेको छ।</p>
<p>आफ्नै घरमा खाटमुनि लुकेको अवस्थामा आज बिहान विनोदलाई पक्राउ गरिएको बसबरिया गाउँपालिकाका अध्यक्ष रामअयोध्या रायले बताए।</p>
<p>जग्गा जमिनको विषयलाई लिएर आफ्नो कान्छो भाइ मदिरा सेवन गरेर पटक-पटक बुबालाई गाली बेइज्जती र कुटपिट गर्दै आएको मृतकका जेठो छोरा रामविश्वास रायले बताएका छन्।<br />
<br />
घटनास्थलमा अहिले इलाका प्रहरी कार्यालय बरहथवाको टोली पुगेर शवलाई जिल्ला अस्पताल मलगंवामा शव परीक्षणका लागि लगिने तयारी भइरहेको अध्यक्ष रायले जानकारी दिए।</p>
<p>सर्लाहीका प्रहरी उपरीक्षक विश्वमणि पोखरलले घटना सम्बन्धमा प्रहरीले थप अनुसन्धान भइरहेको जानकारी दिएका छन्। <em>रासस</em></p>
प्रतिक्रिया दिनुहोस्
.jpg)
