लकडाउनले रोकिएको ‘विजय दिवस परेड’ गर्दै रुस
<p>मस्को। रुसी राष्‍ट्रपति भ्लादिमिर पुटिनले दोस्रो विश्‍वयुद्धको विजय दिवसको ७५ औं वर्ष पुगेको अवसरमा सैन्य परेड आयोजना गरिने बताएका छन्।</p>
<p>हरेक वर्ष ९ मेमा मनाइने उक्त दिवस यसपटक रुसका बासिन्दाले घरभित्रै मनाएका थिए। र, उक्त दिन आयोजना हुने सैन्य परेड पनि कोरोना भाइरस संक्रमणको जोखिमका कारण स्थगित गरिएको थियो।</p>
<p>रुसमा त्यसलाई ‘विजय दिवस परेड’को नाममा चिनिन्छ। उक्त दिवसका अवसरमा मस्कोस्थित रेड स्क्‍वायरमा जवान, पूर्वसैनिक, ऐतिहासिक रेड आर्मीका वाहन तथा अत्याधुनिक सैन्य सामग्री प्रदर्शन गर्ने गरिन्छ।</p>
<p>त्यसबाहेक क्रेमलिनको आकाशमा लडाकु विमानहरूको कलात्मक उडानका लागि पनि उक्त दिवसको सम्झना गर्ने गरिन्छ।</p>
<p>राष्‍ट्रपति पुटिनले रक्षामन्त्री सर्गेई सोइगुलाई जुन महीनामा उक्त समारोहको आयोजना गर्ने तयारी थाल्न निर्देशन दिएका छन्।</p>
<p>सन् १९४५ मा दिग्गज विजेताहरूले परेड गरेको २४ जुनमा उक्त समारोह आयोजना गर्न उनले मन्त्रीलाई निर्देशन दिएका छन्।</p>
<p>पूर्वसोभियत संघका प्रान्त रहेका मुलुकहरूमा विजय दिवस समारोहलाई खास अवसरका रूपमा लिइने गर्छ। दोस्रो विश्‍वयुद्धमा सबै मुलुकका गरी करिब दुई करोड ६० लाख मानिसले ज्यान गुमाएका थिए।</p>
प्रतिक्रिया दिनुहोस्
.jpg)
