रुकुम घटनाः वडाध्यक्षसहित २० जनाविरुद्ध किटानी जाहेरी
<p>काठमाडौं। १० जेठ साँझ पश्चिम रुकुममा जाजरकोटका तीनजनाको मृत्यु र तीनजना बेपत्ता हुने गरी भएको घटनामा मृतकका आफन्तले प्रहरीमा किटानी जाहेरी दिएका छन्।</p>
<p>रुकुमको चौरजहारी नगरपालिका-८ का वडाध्यक्ष डम्बरबहादुर मल्लसहित २० जनाविरुद्ध कर्तव्य ज्यान मुद्दामा किटानी जाहेरी परेको हो।</p>
<p>घटनामा मृत्यु भएका भेरी नगरपालिका-४ जाजरकोटका नवराज विक र गणेशबहादुर बुढा मगर तथा चौरजहारी नगरपालिका-१ का टीकाराम सुनारका अभिभावकले आज जिल्ला प्रहरी कार्यालय जाजरकोटमार्फत् किटानी जाहेरी दिएका हुन्।</p>
<p>जाहेरी जिल्ला प्रहरी कार्यालय पश्चिम रुकुमलाई ‘फरवार्ड’ गरिएको जाजरकोट प्रहरी प्रमुख, डीएसपी किशोर श्रेष्ठले बताए।</p>
<p>भेरी नगरपालिका-४ का नवराज विक १७ जना साथीसहित १० जेठ साँझ मल्ल थरकी आफ्नी प्रेमिकाको गाउँ चौरजहारी नगरपालिका-८ पुगेका बेला गाउँलेको लखेटाइमा परेका थिए।</p>
<p>गाउँलेको लखेटाइपछि भेरी नदीमा परेर नवराजसहित टीकाराम र गणेशको मृत्यु भएको थियो। नवराजको शव १० जेठ राति, टीकारामको शव ११ जेठ साँझ र गणेशको शव १२ जेठ साँझ छुट्टाछुट्टै स्थानमा भेटिएको थियो।</p>
<p>उनीहरूसँगै नदीमा परेका भेरी नगरपालिका-४ का सन्दीप विक, भेरी नगरपालिका–११ का गोविन्द शाही र लोकेन्द्र सुनार अझै बेपत्ता छन्।</p>
<p>उनीहरूको खोजी भइरहेको जाजरकोटका डीएसपी श्रेष्ठले बताए।</p>
<p>बेपत्तालाई खोज्नका लागि सशस्त्र प्रहरीको गोताखोर टोलीसमेत परिचालन गरिने भएको छ। गोताखोर टोली आइपुगेपछि भोलिदेखि परिचालन गरिने उनले बताए।</p>
<p>घटनामा संलग्न रहेको आरोपमा इलाका प्रहरी कार्यालय चौरजहारीले वडाध्यक्षसहित १२ जनालाई नियन्त्रणमा लिएर जिप्रका पश्चिम रुकुमलाई बुझाएको छ।</p>
<p>प्रहरी नियन्त्रणमा रहेकाहरूमा नवराजकी प्रेमिका भनिएकी किशोरी र उनका बुबाआमा पनि छन्। </p>
<p>इप्रका चौरजहारीका प्रमुख, इन्स्पेक्टर धर्मसिंह बिष्टले किटानी जाहेरीका आधारमा जिल्लाको आदेशपछि थप अरूलाई पनि नियन्त्रणमा लिइने बताए।</p>
प्रतिक्रिया दिनुहोस्
.jpg)
