सप्तरीमा होम क्वारेन्टाइनमा रहेकी गर्भवतीको मृत्यु, कोभिड-१९ परीक्षण गर्न स्वाब लिने तयारी
<p>सप्तरी। होम क्वारेन्टाइनमा रहेकी सप्तरीको कञ्चनरुप-११ की २४ वर्षीया एक गर्भवतीको आज मृत्यु भएको छ।</p>
<p>११ जेठ रातिदेखि उनलाई अत्यधिक ज्वरो र श्वासप्रश्वासमा समस्या आएको थियो।</p>
<p>स्वास्थ्य परीक्षणका लागि राजविराज ल्याउने तयारी गरिरहेका बेला आज बिहान मृत्यु भएको परिवारका सदस्यले बताएका छन् ।</p>
<p>गर्भवती महिलालाई १००.२ डिग्री ज्वरो आएपछि ८ जेठमा राजविराजस्थित डा. विनिता यादवको क्लिनिकमा उपचारका लागि लगिएको थियो।</p>
<p>चिकित्सकले पाँच दिनपछि पुनः परीक्षणका लागि बोलाएका थिए ।</p>
<p>जिल्ला स्वास्थ्य कार्यालय सप्तरीका निमित्त प्रमुख दुनियालाल यादवका अनुसार महिलालाई पिसाबको सङ्क्रमण (युटीआइ) भएको भन्दै चिकित्सकले औषधि दिनुका साथै होम क्वारेन्टाइनमा रहन सल्लाह दिएका थिए।</p>
<p>१८ हप्ताकी गर्भवतीलाई १० दिनदेखि ज्वरो आएको थियो। कोभिड-१९ सँग मिल्ने लक्षण देखिएको र होम क्वारेन्टाइनमा रहेकीले मृतकको स्वाब लिने तयारी भइरहेको कञ्चनरुप नगरपालिका स्वास्थ्य शाखाका सिनियर अहेव डम्बर महतोले बताए।</p>
<p>मृतकको स्वाब सङ्कलनको रिपोर्ट नआउञ्जेल दाहसंस्कारका लागि प्रतिक्षा गर्न उपयुक्त हुने महतोले बताएका छन्।</p>
<p>मृतकको साढे पाँच वर्षका जुम्ल्याहा एक छोरा र एक छोरी छन्। <em>रासस</em></p>
प्रतिक्रिया दिनुहोस्
.jpg)
