१३ दिनदेखि उद्धारको पर्खाइमा मुगुको एक परिवार
<p>कैलाली। मुगुको खत्याड गाउँपालिकाका दीपक परियार १३ दिनदेखि पत्नी र चार महिनाको सन्तानसहित उद्धारको पर्खाइमा धनगढीमा अलपत्र परेका छन्।</p>
<p>उनीसँगै भारतबाट आएकाहरू सबै घर पुगिसके। उनी भने धनगढीस्थित कैलाली बहुमुखी क्याम्पसको क्‍वारेन्टाइनमा बसिरहेका छन्।</p>
<p>“सबैको उद्धार भयो, मेरो भएन,” परियारले भने, “कर्णाली प्रदेशका मुख्यमन्त्री र खत्याड गाउँपालिकाका अध्यक्षलाई पनि पटक-पटक आग्रह गरिसकें। तर उद्धारका लागि कसैले वास्ता गरेनन्।”</p>
<p>गाउँपालिकाका अध्यक्षले त फोन पनि उठाउन छाडेको उनको गुनासो छ।</p>
<p>भारतको मथुरामा काम गर्दै आएका दीपक लकडाउनपछि कामबाट निकालिए। उनी भन्छन्, “सेठले कामबाट निकालिदिएपछि बेखर्ची भएँ। त्यहाँ बस्न सक्ने अवस्था रहेन।”</p>
<p>मथुराबाट दुई दिनमा भारतको पलिया आइपुगेका परियारले त्यहाँ १३ दिन क्‍वारेन्टाइनमा बिताए। पलियाबाट धनगढीसम्म आउन पाए पनि घर फर्किन पाएका छैनन्, उनले।</p>
<p>उनको गाउँपालिका बाजुरासँग जोडिएको छ। उनलाई घर जान बाजुराको बाटो भएर छोटो र सहज हुन्छ। तर, बाजुराको गाउँपालिकाले फरक जिल्लाको भन्दै उनलाई लैजान मानेन।</p>
<p>“कर्णाली राजमार्ग भएर जाँदा निकै लामो र कष्टकर यात्रा हुन्छ,” परियारले भने। उनले छिटोभन्दा छिटो उद्धार गरिदिन कर्णाली प्रदेश सरकारसँग आग्रह गरेका छन्।</p>
प्रतिक्रिया दिनुहोस्
.jpg)
