कोभिड-१९ विरुद्धको अर्को खोप मानिसमा परीक्षण गरिँदै
<p>वासिङ्टन। अमेरिकाको मेरिल्यान्डस्थित बायोटेक्नोलोजी कम्पनी नोभाभाक्सले कोरोना भाइरसविरुद्धको खोप मानिसमा परीक्षण थालेको छ।</p>
<p>त्यसका लागि एक सय ३० जनालाई सहभागी गराउने कम्पनीको योजना छ।</p>
<p>कोभिड-१९ विरुद्धको खोप परीक्षण शुरु गर्ने १० औं कम्पनी बनेको छ, नोभाभाक्स। कम्पनीको परीक्षणका लागि खोप लगाउने पहिलो स्वयंसेवक अस्ट्रेलियाका छन्।</p>
<p>खोपको नाम ‘एनभीएक्स-कोभ २३७३’ जुराइएको छ। कम्पनीका अनुसार प्रि-क्लिनिकल परीक्षणमा यस खोपबाट शरीरमा ‘एन्टी बडी’ प्रशस्त उत्पादन भएको पाइएको छ।</p>
<p>“यो परिणामबाट मानिसको शरीरमा प्रतिरक्षा प्रणाली बलियो बनाउन कोभिड-१९ को महामारी नियन्त्रणमा लिन यो खोप प्रभावकारी हुने देखिएको छ,” कम्पनीले जारी गरेको विज्ञप्तिमा भनिएको छ।</p>
<p>आगामी जुलाईसम्ममा प्रारम्भिक सुरक्षा र प्रभावकारिताको परिणाम सार्वजनिक गर्ने कम्पनीको तयारी छ। सकारात्मक परिणाम देखियो भने परीक्षणको दोस्रो चरण शुरु हुनेछ। र, बढीभन्दा बढी मुलुकमा यसको परीक्षण गरिनेछ।</p>
<p>सबै परीक्षणबाट सकारात्मक नतिजा आयो भने यस वर्ष १० करोड डोज र सन् २०२१ मा एक अर्ब डोज खोप उत्पादन गर्ने लक्ष्य रहेको कम्पनीका प्रवक्ताले सीएनएनसँग बताए। उनका अनुसार खोपको उत्पादन सार्वजनिक, निजी र परोपकारी संस्थाहरूको साझेदारीमा गर्ने योजना छ।</p>
प्रतिक्रिया दिनुहोस्
.jpg)
