डब्लूएचओले रोक्यो हाइड्रोक्सिक्लोरोक्वाइनको क्लिनिकल परीक्षण
<p>जेनेभा। विश्‍व स्वास्थ्य संगठन (डब्लूएचओ)ले कोभिड-१९ का बिरामीलाई मलेरियाको औषधि हाइड्रोक्सिक्लोरोक्‍वाइन प्रयोगका लागि गर्न लागिएको क्लिनिकल परीक्षण तत्काललाई रोकेको छ।</p>
<p>डब्लूएचओका महानिर्देशक टेड्रोस अदानम गेब्रेयससले उक्त औषधिको सुरक्षित प्रयोगबारे डाटा सेफ्टी मनिटरिङ बोर्डले अध्ययन गर्ने जानकारी दिए। साथै, संसारभर उक्त औषधिको प्रयोग तथा त्यसबाट भएका फाइदा-बेफाइदाबारे पनि व्यापक विश्लेषण गरिने उनले बताए।</p>
<p>हालै मेडिकल जर्नल ‘लान्सेट’मा प्रकाशित अध्ययन रिपोर्ट उल्लेख गर्दै उनले जहाँ हाइड्रोक्सिक्लोरोक्‍वाइनको प्रयोग गरिएको छ, त्यहाँ मृत्यु जोखिम पनि बढी देखिएको बताए।</p>
<p>गत शनिबार डब्लूएचओको सोलिडारिटी ट्रायल (डब्लूएचओको निगरानीमा भइरहेको कोभिड-१९ को क्लिनिकल ट्रायल) को कार्यकारी समूहको बैठक बसेको थियो। १० वटा सदस्य मुलुकका प्रतिनिधि सहभागी सोही बैठकले हाइड्रोक्सिक्लोरोक्‍वाइनको क्लिनिकल परीक्षण अस्थायी रूपमा स्थगित गर्ने निर्णय लिएको थियो।</p>
<p>अमेरिकी राष्‍ट्रपति डोनाल्ड ट्रम्पले भने निरन्तर हाइड्रोक्सिक्लोरोक्‍वाइनको वकालत गर्दै आएका छन्। आफैंले पनि हाइड्रोक्सिक्लोरोक्‍वाइन सेवन गर्दै आएको उनले बताएका छन्।</p>
प्रतिक्रिया दिनुहोस्
.jpg)
