मोदीको दोस्रो कार्यकालको पहिलो वर्षगाँठमा भर्चुअल र्याली र कन्फरेन्स
<p>नयाँदिल्ली। भारतीय प्रधानमन्त्री नरेन्द्र मोदीको दोस्रो कार्यकाल वर्षदिन पुगेको अवसरमा देशभर भर्चुअल र्‍यालीहरू आयोजना हुने भएका छन्।</p>
<p>देशभर सात सय ५० भन्दा बढी भर्चुअल र्‍यालीको आयोजना गरिने सत्तारुढ भारतीय जनता पार्टी (भाजपा)ले जनाएको छ।</p>
<p>त्यसबाहेक देशभर एक हजारवटा भर्चुअल कन्फरेन्स पनि आयोजना गर्ने उक्त पार्टीको योजना छ। </p>
<p>डिजिटल प्लेटफर्महरू मार्फत ‘आत्मनिर्भर भारत अभियान’का संकल्पलाई १० करोड घरमा पुर्‍याउने योजना रहेको भाजपाको भनाइ छ।</p>
<p>३० मे २०२० मा मोदी सरकार आफ्नो दोस्रो कार्यकालको पहिलो वर्ष पूरा गर्दैछ। वार्षिकोत्सव मनाउने क्रममा ठूलो परिमाणमा मास्क र स्यानिटाइजर घरघरमा पुर्‍याउने योजना पनि भाजपाको छ।</p>
<p>कोभिड-१९ को प्रसार तीव्र गतिमा रहँदा यस वर्ष भाजपाले डिजिटल प्लेटफर्ममा वार्षिकोत्सव मनाउने तयारी गरेको हो।</p>
<p>भारतमा कोरोना भाइरसका संक्रमित एक लाख ३८ हजार आठ सय ४५ जना पुगेका छन्। तीमध्ये चार हजारभन्दा बढीको मृत्यु भइसकेको छ।</p>
<p>“सरकारको दोस्रो कार्यकालको पहिलो वर्षगाँठ मनाउने क्रममा भौतिक दूरीको पूर्ण पालना गरिनेछ,” भाजपाले भनेको छ।</p>
प्रतिक्रिया दिनुहोस्
.jpg)
