विश्वका उत्कृष्ट २० क्रिकेटरकाे सूचीमा सन्दीप र कुशल
<p>काठमाडौं। युनाइटेड अरब इमिरेट्स (यूएई)को द नेशनल डिजिटल पत्रिकाले निकालेको विश्वका २० वर्ष मुनिका उत्कृष्ट २० क्रिकेटरको सूचीमा नेपाली राष्ट्रिय क्रिकेट टिमका दुई खेलाडी परेका छन्।</p>
<p>नेपालका लेग स्पिनर सन्दीप लामिछाने र अलराउण्डर कुशल मल्लले उक्त सूचीमा स्थान बनाएका हुन्। द नेशनलले आज विश्वका २० वर्ष मुनिका उत्कृष्ट २० खेलाडीको तस्वीर सार्वजनिक गरेको हो।</p>
<p>उक्त तस्वीरको सूचीमा १९ वर्षे सन्दीप तेस्रो स्थानमा छन्। १६ वर्षे कुशल मल्ल भने १५ औं स्थानमा छन्। सूचीमा टेष्ट राष्ट्रका खेलाडीहरूको बाहुल्यता छ। एसोसिएट राष्ट्रबाट सन्दीप र कुशलसँगै स्कटल्यान्डका टम म्याकिन्टोस र यूएईका जोनाथन फिगी छन्।</p>
<p>द नेशनलले पाकिस्तानका १७ वर्षे बलर नासीम शाहलाई शीर्ष स्थानमा राखेको छ भने भारतका १८ वर्षे यशस्वी जैसवाललाई दोस्रो स्थानमा राखेको छ।</p>
<p>सन्दीप तेस्रो स्थानमा रहँदा अफगानिस्तानका १९ वर्षे मुजिब रहमान चौथो स्थानमा छ। बंगलादेशका अकबर अली पाँचौं स्थानमा छन्।</p>
<p>उक्त सूचीमा भारतबाट चार खेलाडी समावेश छन् भने पाकिस्तान र बंगलादेशबाट समान तीन खेलाडी छन्। नेपाल र अफगानिस्तानका समान दुई, वेष्ट इन्डिज, अस्ट्रेलिया, दक्षिण अफ्रिका, इङ्ल्यान्ड, युएई र स्कटल्यान्डका एक/एक खेलाडी समावेश छन्।</p>
प्रतिक्रिया दिनुहोस्
.jpg)
