अमेरिकाले ‘राजनीतिक भाइरस’ फैलायोः चिनियाँ विदेशमन्त्री
<p>बेइजिङ। चीनका विदेशमन्त्री वाङ यीले अमेरिकाले ‘राजनीतिक भाइरस’ फैलाएको आरोप लगाएका छन्।</p>
<p>दुई मुलुकबीच तनाव बढ्दै जाँदा विदेशमन्त्री वाङले अमेरिकाले ‘षडयन्त्र र झुठ’ फैलाइरहेको आरोप लगाए। “अमेरिका राजनीतिक भाइरसबाट संक्रमित भएको छ, जसले बारम्बार त्यहाँका केही नेतालाई चीनविरुद्ध आक्रमण गर्न उक्साइरहेको छ,” मन्त्री वाङले पत्रकारहरूसँग भने।</p>
<p>उनले अमेरिकालाई बेकारका कुरामा समय बिताएर आफ्ना नागरिकको अमूल्य जीवन खेर नफाल्न पनि सुझाए।</p>
<p>आगामी नोभेम्बरमा निर्वाचनको सामना गर्दै गरेका अमेरिकी राष्‍ट्रपति डोनाल्ड ट्रम्पमाथि महामारीलाई ‘मिस ह्यान्डल’ गरेको आरोप लाग्दै आएको छ। र, आफूमाथिको आरोपबाट बच्‍न उनले चीनमाथि दोषारोपण गर्दै आएका छन्।</p>
<p>चिनियाँ विदेशमन्त्री वाङले कोरोना भाइरस देखिएलगत्तैदेखि चीन विश्वभरका मानिसको स्वास्थ्य सुरक्षाका उपायमा केन्द्रित रहेको बताए। अमेरिकाका कतिपय राजनीतिक शक्तिहरूले चीन-अमेरिका सम्बन्धलाई बन्धक बनाएको आरोप लगाए।</p>
<p>उनले कुनै शक्तिको नाम त लिएनन् तर ती शक्तिले दुई मुलुकलाई नयाँ प्रकारको शीतयुद्धतिर धकेल्न खोजिरहेको बताए।</p>
<p>“कोरोना भाइरसको क्षति त छँदैछ, अमेरिकाका तर्फबाट राजनीतिक भाइरस फैलाइएको छ र त्यस भाइरसले निरन्तर चीनमाथि आक्रमण र दोष थोपर्ने काम गरिरहेको छ,” उनले भने, “अमेरिकाका कतिपय राजनीतिकर्मीहरू आधारभूत तथ्यलाई लत्याउँदै चीनमाथि लक्षित गर्दै षडयन्त्रको तानाबाना बुनिरहेका छन्।”</p>
प्रतिक्रिया दिनुहोस्
.jpg)
