बुटवलका एकजना बिरामीको भरतपुर अस्पतालमा मृत्यु, कोभिड-१९ परीक्षण गरिँदै
<p>काठमाडौं। चितवनस्थित भरतपुर अस्पतालमा एकजना बिरामीको मृत्यु भएको छ।</p>
<p>बुटवलको लुम्बिनी अस्पतालबाट रेफर गरिएका ४८ वर्षीय एक बिरामीको मृत्यु भएको अस्पतालले जनाएको छ।</p>
<p>भरतपुर अस्पतालका मेडिकल सुपरिटेन्डेन्ट डा. श्रीराम तिवारीले बुटवलबाट ल्याइएका बिरामीको मृत्यु भएको पुष्टि गरे।</p>
<p>“बुटवलबाट गम्भीर समस्या भएपछि यता आइसीयूमा राखेर उपचार गर्न रेफर गरिएको थियो”, उनले भने, “बिहान २ बजेतिर अस्पताल ल्याइपुर्‍याइएको थियो। यता ल्याउँदा ल्याउँदै उनको मृत्यु भयो।”</p>
<p>मृतक बिरामीको एक्सरे गर्दा निमोनिया देखिएको डाक्टर तिवारीले जानकारी दिए। बिरामीका परिवारले श्वास फेर्न गार्‍हो भएपछि आईसीयूका लागि भरतपुर लगेका थिए।</p>
<p>हिजो नै लुम्बिनी अस्पतालबाट मृतक बिरामीको कोभिड-१९ जाँचका लागि स्वाबको नमूना संकलन गरिसकिएको छ।</p>
<p>“नमूना परीक्षणपछि कोभिड-१९ हो होइन भन्‍ने ल्याब रिपोर्टले कन्फर्म गर्छ”, तिवारीले भने।</p>
प्रतिक्रिया दिनुहोस्
.jpg)
