संसारको सबैभन्दा गहिरो सुनखानी बन्द
<p>जोहानेसबर्ग। कोरोना भाइरसको संक्रमण बढ्दै जाँदा दक्षिण अफ्रिकास्थित संसारको सबैभन्दा गहिरो सुनखानी बन्द भएको छ।</p>
<p>दक्षिण अफ्रिकाको गौटेङ प्रान्तस्थित पोनेङ सुनखानी बन्द भएको हो। खानीमा कार्यरत एक सय ६४ जनामा कोरोना भाइरसको संक्रमण देखिएपछि काम बन्द गरिएको हो।</p>
<p>बीबीसीका अनुसार पोनेङ संसारको सबैभन्दा गहिरो सुनखानी हो, जुन एक महीना बन्द रहेर गत अप्रिलमा खुलेको थियो। जमिनको सतहबाट करिब चार किलोमिटर गहिरो छ, यो सुनखानी।</p>
<p>खानीका कामदारमा कोभिड-१९ पोजिटिभ पाइएको छ तर रोगका कुनै लक्षण देखिएका छैनन्।</p>
<p>खानीको सञ्चालक कम्पनी एंग्लो गोल्ड अशान्तिले संक्रमित सबैलाई आइसोलेसनमा राखिएको बताएको छ। गत साता पहिलोपटक कोरोना संक्रमित देखिएपछि ६ सय ५० जना मजदुरको परीक्षण गरिएको थियो। तीमध्ये एक सय ६४ जनामा संक्रमण देखिएको हो।</p>
<p>दक्षिण अफ्रिकामा २१ हजार तीन सय ४३ जनामा कोभिड-१९ पोजिटिभ पाइएको छ। तीमध्ये चार सय सात जनाको मृत्यु भएको छ।</p>
प्रतिक्रिया दिनुहोस्
.jpg)
