मोरङका राजनीतिक दलको सुझाव- ‘भारतसँग सीमा जाेडिएका स्थानीय तहमा दुई हजार क्षमताको क्वारेन्टाइन बनाऊ’
<p>विराटनगर। मोरङका राजनीतिक दलहरूले भारतसँग सीमा जोडिएका सबै स्थानीय तहमा कम्तीमा दुई हजार बेड क्षमताको क्वारेन्टाइन निर्माण गर्न प्रदेश १ सरकारलाई सुझाव दिएका छन्।</p>
<p>भारतमा रेल र बस सेवा सञ्‍चालन भएसँगै सीमावर्ती क्षेत्रबाट नेपाली भित्रिने क्रम बढ्न थालेपछि दलहरूको संयुक्त बैठकले पीसीआर परीक्षणको दायरा बढाउन पनि अनुरोध गरेका छन्।</p>
<p>लकडाउनका बेला नागरिकका समस्या समाधान गर्न र कोरोना नियन्त्रण तथा उपचारको लागि संयुक्त कदम चाल्न पनि दलहरू सहमत भएको नेपाली कांग्रेस मोरङका सभापति डिगबहादुर लिम्बूले जानकारी दिए।</p>
<p>नेपाल कम्‍युनिष्ट पार्टी (नेकपा), नेपाली कांग्रेस, समाजवादी, राप्रपा र राजपाको जिल्ला नेतृत्वको संयुक्त बैठकले किसान उत्पादन गरेको खाद्यान्न तथा फलफूल बजारसम्म ढुवानी र बिक्रीका लागि सहज बनाउन सहयोग गर्ने, खाद्यान्न उद्योगहरू सञ्चालन गराउन सहयोग गर्ने र तरकारीजन्य उत्पादनहरुको बिक्री सहज बनाउने पनि निर्णय गरेको छ।</p>
<p>मल, बीउ र विषादीको व्यवस्था गराउन सहयोग गर्ने, बाँझो जमिनमा अनिवार्य खेती गर्न लगाउने, स्वास्थ्य सुरक्षाका सावधानी अपनाएर विकास निर्माणको कामलाई निरन्तरता दिन सहयोग गर्नुपर्नेमा पनि दलहरूले प्रदेश सरकारको ध्यानाकर्षण गराएका छन्।</p>
<p>नेकपाका अध्यक्ष ऋषिकेश पोखरेलका अनुसार भारत र विदेशमा रहेका नेपालीहरूलाई प्रशासनको समन्वयमा घर फर्काउन प्रदेश र संघीय सरकारसँग आग्रह गर्ने निर्णय पनि बैठकले गरेको छ।</p>
प्रतिक्रिया दिनुहोस्
.jpg)
