चतरास्थित ‘सिद्धबाबा’को आश्रमलाई २०० बेडको कोरोना अस्पताल बनाउने निर्णय
<p>काठमाडौं। प्रदेश सरकारले ‘सिद्धबाबा’भनिने कृष्णदास गिरी संरक्षक रहेको सुनसरीको वराहक्षेत्र नगरपालिका-२ रामानन्दचार्य सेवा पीठ आश्रमलाई कोभिड-१९ अस्पताल बनाउने भएको छ।</p>
<p>एक महिला अनुयायीलाई बलात्कार गरेको अभियोगमा कृष्णदास हाल पुर्पक्षमा थुनामा छन्।</p>
<p>प्रदेश १ का मुख्यमन्त्री शेरधन राईको संयोजकत्वमा दुई दिनअघि बसेको प्रदेशस्तरीय क्राइसिस म्यानेजमेन्ट सेन्टरको बैठकले आश्रममा २०० बेडको कोरोना उपचार केन्द्र बनाउने निर्णय गरेको छ। </p>
<p>प्रदेशमा कोरोना संक्रमितको संख्या बढ्न थालेपछि उक्त आश्रमलाई कोभिड-१९ अस्थायी अस्पताल बनाउने गरी समितिले उपचार तथा रोकथामको कार्ययोजना स्वीकृत गरेको हो।</p>
<p>८५० बेड थप्ने गरी प्रदेश १ सरकारले तयार गरेको कार्ययोजनामा योबाहेक कोशी कोभिड अस्पतालमा १००, झापामा २००, पूर्वाञ्चल विश्वविद्यालय गोठगाउँ २००, बिपी कोइराला स्वास्थ्य विज्ञान प्रतिष्ठान धरानमा ३००, र सैनिक अस्पताल इटहरीमा ५० बेड निर्माण गरिने भएको छ।</p>
<p>१० बिगाहाभन्दा बढी सरकारी जग्गा अतिक्रम गरेर दुई वर्षअघि बनाइएको आश्रममा आठ करोड रूपैयाँभन्दा बढी खर्च गरिएको थियो।</p>
<p style="text-align:center"><img alt="" height="540" src="https://www.dekhapadhi.com/storage/photos/shares/COVID-19/sidhhababa aashram.jpg" width="960" /></p>
<p>चन्दा उठाएर बनाइएको यहाँका कोठाहरू पुर्खाको स्मृतिमा दाताहरूले दिएको सहयोगमा बनेका छन्।</p>
<p>तीनवटा सुविधासम्पन्‍न यस पक्की भवनमा १२८ कोठा छ। आश्रममा रहेका भौतिक संरचना अहिले प्रयोगविहीन छ।</p>
<p>झण्डै एक हजारजनाले योग गर्न सक्न‍े सभा हल र अन्य कोठाहरू खाली छन्। </p>
<p>कोरोना भाइरस संक्रमणको जोखिम बढेदेखि नै स्थानीयवासीले यसअघि नै आश्रमलाई क्वारेन्टाइन बनाउन सुझाव दिएका थिए।</p>
<p>बिजुली, पानीलगायतको सुविधा भएकाले राज्यको पैसा पनि बच्‍ने भन्दै प्रदेश सरकारका प्रवक्ता हिक्मत कार्कीले कोरोना रोकथाम, नियन्त्रण तथा उपचारका लागि आश्रमलाई प्रयोग गर्न सकिने यसअघि नै बताएका थिए।</p>
<p>'धर्मगुरु' को आवरणमा आफ्नै अनुयायीलाई बलात्कार गरेको कर्तुत सार्वजनिक भएसँगै आश्रमको सम्पत्ति सरकारीकरण गर्नुपर्ने आवाज पनि उठ्दै आएको छ।</p>
प्रतिक्रिया दिनुहोस्
.jpg)
