विवादित अभिव्यक्ति दिएपछि वर्षाले मागिन् माफी
<p>काठमाडौं। नेपालको पूर्ण नक्शा जारी भएसँगै भारतीय मिडियाहरू नेपाल र नेपालीमाथि खनिएका छन्। उनीहरूले नेपालबारे भ्रमपूर्ण समाचार सम्प्रेषण गर्नुका नेपालको समर्थन गरेकी बलिउड अभिनेत्री मनिषा कोइरालाविरुद्धसमेत लागेका छन्।</p>
<p>नेपालमा भने मनिषाको समर्थन भइरहेको छ। सम्पूर्ण नेपाली सिने जगत नै मनिषाको समर्थन र नेपालको पक्षमा खुलेर आवाज उठाइरहेका बेला वर्षाले भने यो विषय वार्ताको टेबलमा बसेर समाधान हुने बताएकी छन्।</p>
<p>सार्वजनिक भएको भाइरल भिडिओ क्लिपमा उनले अब आफूलाई भारतीय साथीहरूसँग कसरी ‘फेस’ गर्ने भन्नेमा चिन्ता भएको जनाएकी छन्।</p>
<p>भिडिओ क्लिपमा भन्छिन्,“देशको माया लाग्छ भन्दैमा यो हाम्रै हो तिमीहरूले किन यस्तो गरेको भनेर झगडा गर्ने कुरा होइन। यो त टेबल टक गरेर यताको सरकार र उताको सरकार मिलेर गर्ने कुरा हो। यहाँ त दुवैतर्फका पत्रकारहरू मिलेर झगडा पारिरहेका छन्।”</p>
<p>उनले थपिन्, “मेरो इन्डियन साथीहरूसँग मैले कसरी फेस गर्ने र मेरो इन्डियन साथीहरूले मसित कसरी फेस गर्ने भइरहेको छ।”</p>
<p>वर्षाको यो भनाइलाई सामाजिक सञ्जाल प्रयोगकर्ताहरूले भारतीय साथीहरूलाई यसबारे यथार्थ बताउनुका साटो उल्टै साथी रिसाउनेमा चिन्ता व्यक्त गरेको भन्दै आक्रोश व्यक्त गर्न थालेका छन्।</p>
<p><strong>वर्षाको स्पष्टीकरण</strong></p>
<p>भिडिओ क्लिपबाट विवादमा मुछिएकी वर्षाले सामाजिक सञ्जालमार्फत् नै यसले भावनामा ठेस पुगेको जनाएकी छन्।</p>
<p>इन्स्टाग्राममा उनले भनेकी छन्, “हिजो एउटा अन्तर्वार्तालाई लिएर जुन हो-हल्ला गरियो, त्यसले मलाई भावनात्मक ठेस पुगेको छ। हो, प्रत्यक्ष प्रसारण भइरहेको कार्यक्रममा बोल्दै जाँदा म कुनै कुरामा चुकेँ होला, बोल्दै जाँदा जिब्रो चिप्लियो होला तर, मनभित्र आफ्नो देश, आफ्नो राष्ट्रियताप्रतिको सम्मानमा म अलिकति पनि चुकेकी छैन, अलिकति पनि माथि-तल परेकी छैन।”</p>
<p>संसारमा कुनै पनि देशका नागरिकलाई आफ्नो माृतभूमिप्रति माया हुने भन्दै उनले भनिन्, “नेपाली कलाकार भनेर हाम्रो त पहिचान नै देश र राष्ट्रियतासँग जोडिएको हुन्छ। आफ्नो परिचयलाई नै अंगीकार गर्न सक्ने यति ठूलो र महान सम्मानलाई म उच्च ओहोदामा राख्छु। म नेपाली हुँ, मलाई गर्व छ।"</p>
<p>लिम्पियाधुरा, लिपुलेक र कालापानीसम्मको भूमिलाई समेटेर जारी गरिएको पूर्ण नक्शाप्रति समर्थन जनाउँदै उनले आफू अग्रपंक्तिमा उभिन तयार रहेको बताइन्।</p>
<p>एउटा व्यक्ति, एउटा नागरिक मात्रले समर्थन गरेर नहुने भन्दै भनिन्, “हामी सबै नेपाली सँगै उभिएर समर्थन गर्नुपर्छ। समर्थन गर्नुपर्छ वार्ता गर्ने उचित वातावरणको, समर्थन गर्नुपर्छ तथ्य र सत्यको, समर्थन गर्नुपर्छ हामी दुई छिमेकीको प्रगाढ सम्बन्धको, समर्थन गर्नुपर्छ हाम्रो रोटी-बेटी सम्बन्धको र सबैभन्दा धेरै समर्थन गर्नुपर्छ मानवता र मानव धर्मको।”</p>
<p>यस्तो संवेदनशील समयमा भड्काउ तत्त्वहरूले आक्रमण गर्न सक्ने र दुई देशको अन्तरदेशीय सम्बन्ध बिगार्न सक्ने भन्दै भारतीय मिडियाले उचालेका केही शब्दहरूले त्यसको असर देखिन सक्ने उनले बताएकी छन्।</p>
<p>मनिषा कोइरालाप्रति पूर्ण समर्थन रहेको भन्दै प्रत्यक्ष प्रसारण भइरहेको कार्यक्रममा बोल्दा भएको गल्तीप्रति माफीसमेत मागिन्।</p>
प्रतिक्रिया दिनुहोस्
.jpg)
