बागलुङका चार स्थानीय तह १० दिनका लागि 'सिल'
<p>बागलुङ। कोरोना संक्रमणको जोखिम हुन नदिन आजदेखि जिल्लाका चार स्थानीय तह 'सिल' गरिएको छ।</p>
<p>बडिगाड, निसीखोला, तमानखोला गाउँपालिका र ढोरपाटन नगरपालिकाका मुख्य नाका २० जेठसम्मलाई 'सिल' गरिएको हो ।</p>
<p>स्थानीय तहका प्रमुख, सुरक्षा निकायका प्रतिनिधिलगायतको संयुक्त बैठकले उक्त निर्णय गरेको बडिगाड गाउँपालिकाका अध्यक्ष मेहरसिंह पाइजाले बताए</p>
<p>“एम्बुलेन्स र बिरामी बोकेका बाहेक कुनै सवारीसाधन चल्न नदिने निर्णय भएको छ”, उनले भने “निर्माण सामग्रीको ढुवानी साँझ ५ बजेपछि मात्र गर्न दिइनेछ ।”</p>
<p>बैठकले खाद्यान्न बोक्ने पिकअप जिपसमेत चल्न नदिने निर्णय गरेको छ ।</p>
<p>भारतबाट आउनेको संख्या बढ्दै गएको र स्क्रमणको जोखिम बढेकोले लकडाउनलाई कडाइ गर्नुपरेको अध्यक्ष पाइजाले जानकारी दिए।</p>
<p>भारतलगायत बाहिर जुनसुकै ठाउँबाट आउन चाहने नागरिकलाई चारै स्थानीय तह मिलेर उद्धार गर्ने सहमति पनि गरेका छन्। पछिल्लो समय भारतमा अलपत्र परेका सर्वसाधारण गाउँ फर्कन थालेका छन्।</p>
<p>पछिल्ला दुई दिनमा बडिगाड गाउँपालिकाका ६० जना भारतबाट आएका छन्। उद्धार गरी ल्याइएका सबैलाई क्वारेन्टाइनमा राखिएको गाउँपालिकाले जनाएको छ।</p>
<p>झण्डै ५०० जना भारतबाट फर्कने गाउँपालिकाको अनुमान छ।</p>
<p>त्यस्तै गलकोट नगरपालिकामा पनि हिजो २५ जना भारतबाट आएका छन्। भारतका विभिन्न ठाउँमा अलपत्र परेका व्यक्ति गलकोट फर्कन शुरू गरेको वडा नम्बर ३ का अध्यक्ष वीरजङ्ग भण्डारीले बताए।<em> रासस</em></p>
प्रतिक्रिया दिनुहोस्
.jpg)
