डडेल्धुराका संक्रमित व्यक्ति सरकारी कर्मचारी, आवाससँगै चार कार्यालय 'सिल'
<p>अमरगढी। डडेल्धुरामा कोभिड-१९ पोजिटिभ देखिएका व्यक्ति सरकारी कर्मचारी भएको खुलेको छ। दुई दिनअघि संक्रमण पुष्टि भएका उनी डडेल्धुरा सदरमुकामकै कार्यालयमा कार्यरत हुन्। संक्रमणसँगै आवास र चार कार्यालय 'सिल' गरिएको छ।</p>
<p>डडेल्धुरा अस्पतालमा स्क्रब टाइफसको उपचार गराउन आएका ती व्यक्तिको स्वाब सङ्कलन गरी परीक्षण गरिएको थियो।</p>
<p>परीक्षणपछि उनी स्क्रब टाइफसको औषधि लिएर अस्पतालबाट फर्किएका थिए तर पछि उनको रिपोर्ट पोजिटिभ आएको हो।</p>
<p>संक्रमितसँग सम्पर्कमा आएका कर्मचारी, सञ्चारकर्मी, होटल सञ्चालक तथा डडेल्धुरा अस्पतालमा कार्यरत स्वाथ्यकर्मी र कर्मचारी गरी १५० जनाको स्वाब परीक्षण गरिएको छ।</p>
<p>२० जनाको आरडीटी गरिएको र चिकित्सकसहित सातजना आइसोलेसनमा राखिएको स्वास्थ्य कार्यालय डडेल्धुराका प्रमुख आशुतोष श्रेष्ठले बताए। </p>
<p>जिल्लामा भारतबाट फर्किएका नागरिकलाई सबै स्थानीय तहले क्वारेन्टाइनमा राखेको प्रमुख जिल्ला अधिकारी जगन्नाथ पन्तले बताए।</p>
<p>यहाँका सात स्थानीय तहका ३० हजार सङ्ख्यामा डडेल्धुराबाट भारत गएको तथ्याङ्क छ।</p>
<p>हिजोसम्म ६२६ जना क्वारेन्टाइनमा रहेको प्रजिअ पन्तले जानकारी दिए। <em>रासस</em></p>
प्रतिक्रिया दिनुहोस्
.jpg)
