विश्व विजेता गोट्जेले डर्टमण्ड छाड्ने
<p>काठमाडौं। जर्मनीका विश्वकप विजेता मारियो गोट्जेले जारी सिजन सकिएपछि बोरुसिया डर्टमण्ड छाड्ने क्लबका खेलकुद निर्देशक माइकल जोर्कले बताएका छन्।</p>
<p>जोर्कले गोट्जेसँग यस विषयमा पछिल्लो केही दिनयता व्यापक छलफल भएको र अर्को सिजन क्लब छाड्नेमा सहमत भएको बताएका छन्।</p>
<p>‘‘हामीले आपसी समझदारीमा यो निर्णय लिएका हौं। मलाई विश्वास छ यसले दुवै पक्षलाई फाइदा हुनेछ’’, जोर्कले भने।</p>
<p>२०१४ मा जर्मनीले विश्वकपको उपाधि जित्दा अर्जेन्टिनाविरुद्धको फाइनल खेलमा गोट्जेले निर्णायक गोल गरेका थिए। त्यससँगै उनलाई जर्मनीमा नायकको रूपमा चित्रित गरिएको थियो।</p>
<p>२७ वर्षे फरवार्ड गोट्जेले डर्टमण्डबाट २१८ खेल खेलिसकेका छन्। तर, जारी सिजन उनी लय भेट्टाउन संघर्ष गरिरहेका छन्।</p>
<p>उनले २०२० मा डर्टमण्डबाट सबै खालको प्रतियोगिता गरी जम्मा २० मिनेट खेलेका छन्।</p>
<p>उनले पाँच बुन्डेसलिगा उपाधि जितेका छन्। डर्टमण्डका प्रशिक्षक लुसियन फाभ्रेले क्लबले अहिले अँगालेको शैलीमा आक्रामक मिडफिल्ड फिट नहुने बताएको भोलिपल्ट खेलकुद निर्देशकले गोट्जेले अर्को सिजन क्लब छाड्ने बताएका हुन्।</p>
प्रतिक्रिया दिनुहोस्
.jpg)
