धनगढीमा तयार भयो ५० शय्याको कोरोना अस्पताल
<p>कैलाली। सुदूरपश्‍चिम प्रदेश सरकारले धनगढीमा ५० शय्याको कोरोना अस्पताल तयार पारेको छ।</p>
<p>कोरोना भाइरस संक्रमणका बिरामीको उपचारका लागि ९४ लाख रुपैयाँ लागतमा निर्माण सम्पन्न गरिएको अस्पताल भवन निर्माण व्यवसायीले स्वास्थ्य कार्यालय कैलालीलाई हस्तान्तरण गरेका छन्।</p>
<p>स्वास्थ्य कार्यालय कैलालीका निमित्त प्रमुख लालबहादुर धामीले नयाँ भवनमा आवश्यक उपकरण जडान भइरहेको जानकारी दिए। स्वास्थ्य अवस्था सामान्य रहेका र शंकास्पद बिरामीलाई आजैदेखि अस्पतालमा राख्‍ने तयारी गरिएको उनले बताए।</p>
<p>उनका अनुसार स्वास्थ्य कार्यालयले उक्त भवन सेती प्रादेशिक अस्पताललाई हस्तान्तरण गर्ने तयारी छ।</p>
<p>भवन निर्माणको जिम्मा पाएको किनारा कन्ट्रक्सनले जिल्ला समन्वय समिति कैलालीको जग्गामा ५० शय्याको आइसोलेसन कक्षसहितको भवन निर्माण गरेको थियो।</p>
<p>हाल सेती प्रादेशिक अस्पतालमा २४ शय्याको आइसोलेसन कक्ष मात्र छ। २२ जना कोरोनाका शंकास्पद बिरामीलाई अहिले अस्पतालको आइसोलसन कक्षमा राखिएको अस्पतालका सूचना अधिकारी दिलिप श्रेष्‍ठले जानकारी दिए।</p>
प्रतिक्रिया दिनुहोस्
.jpg)
