मनमोहन कार्डियोथोरासिकमा उपचाररत कोरोना संक्रमित महिलालाई शिक्षण अस्पतालको आइसोलेसनमा सारियो
<p>काठमाडौं। हेटौंडा उपमहानगरपालिकाकी ५४ वर्षीया कोरोना संक्रमित महिलालाई मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरबाट त्रिवि शिक्षण अस्पतालको आइसोलेसन कक्षमा सारिएको छ।</p>
<p>मनमोहन कार्डियोथोरासिकमा उपचाररत ती महिलामा हिजो कोरोना संक्रमण पुष्‍टि भएको थियो।</p>
<p>संक्रमित बिरामीको उपचार गर्न बनाइएको आइसोलेसन कक्षमा सारेर उपचार भइरहेको त्रिवि शिक्षण अस्पतालका कोभिड-१९ संयोजक डा. सन्तकुमार दासले जानकारी दिए।</p>
<p>“हामीले राति नै बिरामीलाई आइसोलेसन कक्षमा सारिसकेका छौं,” उनले भने, “उहाँको स्वास्थ्य अवस्था सामान्य छ। थप सुरक्षा अपनाएका छौं।”</p>
<p>ती महिलामा संक्रमित पुष्‍टि भएपछि अस्पततालको आईसीयूसहितका विभाग बन्द गरिएको उनले जानकारी दिए।</p>
<p>बिरामी महिलाको उपचारमा संलग्‍न चिकित्सकसहित नजिकको सम्पर्कमा रहेका मानिसहरूको नमूना परीक्षण गरिने छ। </p>
<p>डा. दासले मुटु रोगको बिरामी ती महिला ४ जेठ राति मनमोहन कार्डियोथोरासिकमा भर्ना भएको जानकारी दिए। यसअघि कपिलवस्तुबाट उपचारका लागि आएकी ६ वर्षीया बालिकामा पनि संक्रमण पुष्‍टि भएको थियो। ती बालिकाको पनि त्रिवि शिक्षण अस्पतालकै आइसोलेसन कक्षमा उपचार जारी छ। </p>
<p>बिरामीहरूमा कोरोनाको संक्रमण देखिन थालेपछि थप सुरक्षा सतर्कता अपनाउन थालिएको त्रिवि शिक्षण अस्पतालका कार्यकारी निर्देशक डा. प्रेमकृष्ण खड्गाले बताए।</p>
प्रतिक्रिया दिनुहोस्
.jpg)
