दिल्लीमा क्यान्सरको उपचार गरेर फर्किएका एकै परिवारका ३ जनामा कोरोना संक्रमण
<p>काठमाडौं। चितवनको भरतपुर महानगर ६ मा आज बिहानै एकजना नयाँ कोरोना संक्रमित थपिए। भरतपुर ६ केसरबाघका ५२ वर्षीय पुरुषमा कोरोना संक्रमणको पुष्टी भएको हो। भरतपुर अस्पताल कोभिड १९ प्रयोगशालामा गरिएको पीसीआर परीक्षणका क्रममा उनमा कोरोनो पोजिटिभ देखिएको स्वास्थ्य मन्त्रालयले पुष्टी गरेको थियो। </p>
<p>यसअघि हिजो पनि केसरबाघका दुईजनामा कोरोना संक्रमणको देखिएको थियो। ७४ वर्षीय वृद्ध र ७३ वर्षीया वृद्धामा कोरोना संक्रमण देखिएको थियो। दुवैजना श्रीमान-श्रीमती हुन्।</p>
<p>आज पोजिटिभ देखिएका व्यक्ति उनीहरूकै छोरा रहेको भरतपुर महानगर स्वास्थ्य महाशाखा प्रमुख दीपक सुवेदीले जानकारी दिए। भारतको नयाँदिल्लीस्थित राजीव गान्धी क्यान्सर अस्पतालमा उपचार गराएर ३ जेठमा उनीहरू घर फर्किएका थिए। </p>
<p>वृद्धमा फोक्सोको समस्यादेखिएपछि श्रीमती र छोरासहित तीनैजना उपचारका लागि दिल्ली गएका थिए। नेपाल फर्किएदेखि तीनैजना अलग्गै फ्ल्याटमा बस्दै आएका छन् । उनीहरुलाई कान्छा छोरा-बुहारीले खाना खुवाउँदै आएका थिए। श्रीमान-श्रीमतीलाई हिजो नै कोरोना पोजिटिभ देखिएको थियो भने छोराको रिपोर्ट आउन बाँकी थियो। </p>
<p>संक्रमित दुवैजनालाई भरतपुरको कोरोना विशेष अस्थायी अस्पतालमा राखिएको थियो। तर, स्वास फेर्न समस्या भएपछि हिजो राति ९ बजे भरतपुर अस्पतालको आइसोलेसनमा राखेर उपचार भइरहेको भरतपुर अस्पतालका प्रमुख मेडिकल सुपेरिटेन्डेन्ट डा. श्रीराम तिवारीले जानकारी दिए।</p>
<p>"अवस्था सामान्य छ। फोक्सोमा संक्रमण र वृद्ध भएकाले उपचारमा कुनै समस्या नहोस् भनेर हिजो राति भरतपुर अस्पतालमा ल्याएका छौं। छोरा भने कोरोना विशेष अस्पतालमै हुनुहुन्छ," डा.तिवारीले भने। </p>
<p>उनीहरू कृष्णनगर नाकासम्म भारतीय एम्बुलेन्समा आएका थिए। त्यहाँबाट भरतपुरकै एम्बुलेन्समा घरसम्म आएका थिए।</p>
प्रतिक्रिया दिनुहोस्
.jpg)
