यस्तो छ रूपन्देही र चितवनका नयाँ संक्रमितको ट्राभल हिस्ट्री
<p>काठमाडौं। रूपन्देही र चितवनमा थप ९ जना नयाँ संक्रमित देखिएका छन्। प्रादेशिक जनस्वास्थ्य प्रयोगशाला भैरहवा र भरतपुर अस्पताल कोभिड १९ प्रयोगशालनमा गरिएको पीसीआर परीक्षणबाट रूपन्देहीका ८ र चितवनका १ जनामा कोरोना संक्रमण पुष्‍टी भएको हो। </p>
<p>रूपन्देहीका गैडहवा गाउँपालिमाका मात्र ७ जना कोरोना संक्रमित देखिएका छन्। उनीहरू सबै जना १५/१६ दिन अगाडि मात्र नेपाल आएर क्‍वारेन्टाइनमा बसिरहेका थिए। उनीहरू सबै भारतको मुम्बईबाट आएको गाउँपालिकाका स्वास्थ्य अधिकृत विष्‍णुप्रसाद उपाध्यायले जानकारी दिए। </p>
<p>उनीहरूमध्ये ३ जना रूपन्देहीको ककरहवा र ४ जना कपिलवस्तुको अलिगडवा नाकाबाट नेपाल आएका थिए। नेपाल प्रवेश गर्नेबित्तिकै उनीहरुलाई गाउँपालिकाले क्‍वारेन्टाइनमा राखेको थियो। योसँगै गाउँपालिकामा १७ जना कोरोना संक्रमित बनेका छन्। </p>
<p>त्यस्तै रूपन्देहीकै रोहिणी गाउँपालिकामा १ जना नयाँ कोरोना संक्रमित फेला परेका छन्। १४ दिन भारतीय क्‍वारेन्टाइनमा बसेर नेपाल प्रवेश गरेका थिए। सुनौली नाका हुँदै नेपाल प्रवेश गरेका उनलाई रामनरेश माविको क्‍वारेन्टाइनमा राखिएको थियो। </p>
<p>सामान्य अवस्थामा रहेका उनलाई कोरोना परीक्षण गरेर घर पठाउने तयारी भइरहेका बेला कोरोना पोजिटिभ देखिएको गाउँपालिकाका प्रमुख प्रशासकीय अधिकृत रोमनाथ पौडेलले जानकारी दिए। </p>
<p>अहिले क्‍वारेन्टाइनमै रहेका उनलाई उपयुक्त आइसोलसनमा राख्‍ने तयारी भइरहेको उनको भनाइ छ। </p>
<p>भारतबाट आउनेहरूको संख्या दिनप्रतिदिन बढ्दै गएकाले जोखिम बढिरहेको उनले बताए। हिजो राति र ९ जेठमा मात्रै ९० जना भारतबाट आएको र उनीहरूलाई विभिन्‍न क्‍वारेन्टाइनमा राखिएको पौडेलले जानकारी दिए ।</p>
<p>त्यस्तै चितवनको भरतपुर महानगर ६ मा फेला परेका नयाँ संक्रमितबारे थप बुझ्औने काम भइरहेको महानगरका प्रमुख प्रशासकीय अधिकृत प्रेमराज जोशीले जानकारी दिए।</p>
प्रतिक्रिया दिनुहोस्
.jpg)
