न्युयोर्कमा कोभिड-१९ का बिरामीलाई असुरक्षित नर्सिङ होममा पठाइएको खुलासा
<p>न्युयोर्क। एपी न्युजको एक अनुसन्धानअनुसार न्युयोर्कमा कोभिड-१९ का ठूलो संख्याका बिरामीलाई असुरक्षित अस्पतालमा पठाइएको पाइएको छ।</p>
<p>करिब चार हजार तीन सय बिरामीलाई शुरुमै असुरक्षित अस्पतालमा पठाइएका कारण मृत्यु भएको उक्त अनुसन्धानबाट खुलासा भएको छ।</p>
<p>कोरोना भाइरसको संक्रमणमा परेका बिरामीले उपचारका लागि शय्या पाऊन् भन्ने उद्देश्यले नर्सिङ होमको स्तर विचार नगरी पठाइएको पाइएको एपी न्युजले जनाएको छ।</p>
<p>न्युयोर्क सरकार अहिले सोही निर्णयका कारण आलोचनामा परेको छ।</p>
<p>“हाम्रो समाजका सबैभन्दा कमजोर सदस्यको जिन्दगी सुरक्षित राख्न राज्यले सकेन,” वालस्ट्रिट जर्नलमा गत साता डेमोक्रेटिक नेता रोन किमले भनेका थिए, “कोभिड-१९ का बिरामीलाई उपचारका लागि यस्ता ठाउँमा पठाइयो, जहाँ उनीहरूको उपचारका लागि राम्रो सुविधा थिएन। यो घातक निर्णय थियो।”</p>
<p>त्यसयता एपी न्युजले अनुसन्धान थालेको थियो, जसबाट धेरै बिरामीको मृत्यु असुरक्षित नर्सिङ होममा भएको खुलेको हो।</p>
<p>हिजोसम्ममा न्युयोर्क राज्यमा २३ हजार तीन सयभन्दा बढीले कोभिड-१९ का कारण ज्यान गुमाइसकेका छन्। कुल संक्रमित संख्या करिब तीन लाख ६० हजार पुगिसकेको छ।</p>
प्रतिक्रिया दिनुहोस्
.jpg)
