भारतमा अलपत्र चार किरियापुत्रीसहित ३७८ नेपालीको उद्धार
<p>बैतडी। किरियापुत्रीसहित सीमानाका झुलाघाटबाट ३७८ जनाको आज उद्धार गरिएको छ।</p>
<p>भारतका विभिन्न स्थानबाट आएर सीमावर्ती बजार झुलाघाट र पिथौरागढमा अलपत्र परेका चार किरियापुत्रीसहित सो संख्यामा सीमानाका झुलाघाटबाट उद्धार गरिएको हो।</p>
<p>उद्धार गरिनेमा बैतडीका १६२, बझाङका १००, बाजुराका ३०, अछामका तीन, डडेल्धुराका पाँच, दार्चुलाका ११ र कञ्चनपुरका ६ जनासहित १२ जिल्लाका नागरिक छन्। </p>
<p>सीमानाकामा सामान्य चेकजाँच मात्रै गरेर नेपाली नागरिकलाई स्वदेश ल्याइएको हो।</p>
<p>सीमानाका झुलाघाटबाट फर्केका नागरिकलाई सम्बन्धित जिल्ला पठाइएको र बैतडीको हकमा सम्बन्धित स्थानीय तहमा पठाइएको सहायक प्रमुख जिल्ला अधिकारी लोकेन्द्रसिंह नेगीले जानकारी दिए।</p>
<p>यसअघि गत १८ वैशाखमा पनि झुलाघाट नाकाबाट नेपालीको उद्धार गरिएको थियो।</p>
<p>यसैबीच सीमानाका झुलाघाटबाट ११ भारतीय नागरिक पनि स्वदेश फर्केका छन्। नेपाल र भारतका स्थानीय प्रशासनबीच भएको सहमतिअनुसार दुवै देशका अलपत्र परेका नागरिकलाई आ-आफ्ना देशमा आवतजावत गर्न दिइएको हो।</p>
<p>१० दिनदेखि भारतीय क्वारेन्टाइनमा बसेर किरिया गरिरहेका चारजनाले आज मात्रै स्वदेश फर्कन पाएका छन्। <em>रासस</em></p>
प्रतिक्रिया दिनुहोस्
.jpg)
